Před 50 lětami załoženy wjesny klub je nadal aktiwny

Sernjany (SN/MWj). 50lětne wobstaće wjesneho kluba woswjeća wot dźensnišeho hač do njedźele w Sernjanach, a to z wulkim swjedźenjom na swjedźenišću při Klóšterskej wodźe. Jedyn z tych, kotřiž su 1976 klub załožili, je dźensniši wjesnjanosta gmejny Ralbicy-Róžant Hubertus Ryćer (njestronjan). Dalši běchu Měrćin Ditrich, Jurij Korjeńk, Měrćin Zahon a Jurij Bjeńš.

Bywši korčmar Jan Kokla bě jich něhdy, jako su we wjesnej korčmje jako młodostni karty hrali, napominał, tola raz něšto za wjes činić, so Hubertus Ryćer dopomina. Při tym drje bě wón na wjesne swjedźenje w 1960tych lětach myslił, kotrež běštaj Pawoł Rota a Měrćin Wjeńk přihotowałoj.