We wobłuku Łužiskeho hudźbneho lěća 2026 zaběrachu so zašłu sobotu w Hórkach z Hanku Šěrcerc. Jeje dóńt dótka so temoweho lěta „Tacheles – židowska kultura w Sakskej 2026“.

Hórki (SN/MiR). Wobdźělnicy sćěhowachu z Chróšćanskeje 17 po wsy ducy na wšelakich stacijach stopam dźěsća a młodostneje, kotruž je Gestapo w Drježdźanach w lěće 1942 přesłyšowała. Kopolak před bydlenskim domom w Hórkach, jenički po wšěm swěće w serbskej rěči, pokazuje na Annemarie Kreidl. Wona bě jako dźěćo němskeje židowskeje maćerje w serbskej swójbje wotrostła. Dotal njeje znate, na kotre wašnje a hdźe je Hanka zemrěła. Šěrcec su holčku, kotraž běše jako młodostna katolskej cyrkwi přistupiła, jako swoju přiwzali.