Wosrjedź najwjetšeje horcoty je so 19-lětna Mila Dźisławkec z Dobrošic póndźelu tydźenja do redakcije Serbskich Nowin podała, zo by nam tři njedźele w dźěle poboku była. Loni złoži maturu na Serbskim gymnaziju w Budyšinje a dźěłaše po tym najprjedy w Chróšćan starowni swjateje Ludmile. Wot nowembra hač do julija skutkowaše jako aupair w Norwegskej a Nižozemskej, doniž njeje so zaso do Łužicy nawróćiła. Nětk chce Mila najprjedy w domiznje wostać, lěto dźěłać a nazhonjenja we wšelakich powołanjach nazběrać. Hakle potom so wo studij abo wukubłanske městno požada.
Wězo wužiwa tež swój wólny čas na kreatiwne wašnje, mjez druhim moluje. Nimo toho wěnuje so wolejbulej a so rady wuchodźuje.
Pola nas ma wšědny dźeń kaž redaktorka: Wona wobdźěla so na rańšej konferency, planuje nowinu sobu, přejima nadawki za rešerše a pisa aktualne artikle. Jeje prěni wjetši projekt běše přinošk składnostnje róčnicy Chróšćan zběžka. W teksće rozprawješe wo tym, kak so něhdyši šulerjo 5. lětnika lěta 2001 na turbulentny měsac dopominaja a što dźensa wo tym mysla.
