Budyska Allendowa štwórć dóstanje wjele pjenjez za přetwar

Budyšin (CS/SN). Allendowa štwórć w Budyšinje je loni swoje 50lětne wobstaće swjećiła. W lětach wot 1973 do 1975 natwarjena štwórć, skićeše za tehdyše poměry wysoku bydlensku kwalitu. Ale naroki na moderne bydlenje su so w zašłych lětdźesatkach změnili. Předewšěm bjezbarjernosć je wulki problem. Tež rozrjadowanje bydlenjow dźensnišim wočakowanjam njewotpowěduje. Něštožkuli dyrbja potajkim polěpšić. Hižo lěta 2023 bě idejowa konferenca wo přichodźe měšćanskeje štwórće. Tomu slědowachu rozmołwy z přenajerjemi bydlenjow, z towarstwami, socialnymi zarjadnišćemi a dalšimi akterami. Nazymu 2025 móžachu wobydlerjo swoje ideje a namjety přidać. Z toho wšeho nasta wuwićowy koncept, kotryž je měšćanska rada w nowembru wobzamknyła a z kotrymž so wo spěchowanje prócowachu.