Fukov (CS/SN). Mjeztym hižo 14. raz wotmě so minjeny pjatk domizniske zetkanje w čěskim Fukovje (něm. Fugau) w Šluknovskim wuběžku. Wjes njedaloko Hołbina a Wopakeje na čěskim teritoriju bu před 66 lětami zničena. Hižo do toho běchu němskich wobydlerjow wućěrili, štož bě sćěh Druheje swětoweje wójny. Dołhi čas zdaše so wujednanje mjez Čechami a Němcami njemóžne. Zo pak so nětko hižo telko lět zhromadne zetkanje wobydlerjow z wobeju bokow hranicy na starym kěrchowje w Fukovje wotměwa, swědči wo tym, zo móža rany počasu hojić a zo je wujednanje móžne.

Něhdźe 200 ludźi bě so na Božu mšu pod hołym njebjom zešło, kotruž swjećeštaj celebrantaj, fararjej Waldemar Styra z Leutersdorfa a Karel Havelka z Litoměřic. Kemše běchu dwurěčne. We wołtarnišću steješe model Fukovskeje cyrkwje, kotryž bě mjeztym zemrěty Johannes Kunze zhotowił. Zakładne murje cyrkwje bjezposrědnje pódla kěrchowa su mjeztym zaso widźeć. Před lětom běchu hišće wot kerkow a štomow zarosćene.