Ludowa uniwersita we Wojerecach móže tola dołhodobnje dale dźěłać

Wojerecy (SN/MiR). Po cyłej Němskej je 827 ludowych uniwersitow (VHS) z 2 700 wonkownymi stejnišćemi, kotrež su do zwjazka ludowych uniwersitow zapřijate. Jich prěnjotny nadawk je, ludźom kompetency za měnjacy so swět posrědkować. Zwjazk słuži zdobom wuměnje mjez jednotliwymi zarjadnišćemi. Tak móže jedne kubłanišćo druhemu na přikład ideje a poskitki posrědkować. Z toho ma tež Wojerowska ludowa uniwersita wužitk. Před lětom hakle běchu wobalku programoweho zešiwka Zhorjelskeho zarjadnišća přewzali.