Čelchow/Zdźěr (UM/SN). Štóž ze sewjera po zwjazkowej dróze B 156 do Budyšina jědźe, dyrbi kedźbować, zo swojim myslam přejara pućować njeda. Přetož južnje Delnjeho Wujězda je ze zwjazkoweje dróhi na 15 kilometrach jara komfortabelny puć nastał. Na nim dyrbiš so wědomje ke koncentraciji nuzować. Jenož někotre křiwicy a křižowanišća kaž tež Lěskej, Komorow, Zdźěr a Čelchow sej žadaja, zo spěšnosć na 70 resp. 50 km/h redukuješ. Nimo noweje kupy srjedź puća jědźeš do Zdźěrje, hdźež maš ze sewjerneho směra nalěwo kombinowany chódnik a kolesowanski puć, naprawo pak wosebitu jězdnu za kolesowarjow. Chětro wjele komforta za kolesowarjow, móhł sej wodźer awta myslić. Kumštnje nastata wuskosć pak šoferow nuzuje, předpisanu spěšnosć dodźeržeć.

W Čelchowje je hłowny puć přez wjes podobnje wuhotowany kaž w Zdźěri, mjenujcy ze srjedźnej kupu na kóždej kromje wsy, z kombinowanej šćežku za pěškow a kolesowarjow kaž tež z wosebitej jězdnej za kolesowarjow. We woběmaj wsomaj je gmejna Wulka Dubrawa składnosć wužiła, busowe zastanišća tak přetwarić, zo so zadźěwki zhubja.