Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (9)

Štó tule temu nastupajo wěstu mučnotu njezačuwa? Po lětach horcych debatow je wo šćěpjenjach po zdaću hižo tójšto prajene. A runje dokelž je zakładna wěda wo tym a našim imunitnym systemje tak kompleksna, nastawaja přeco zaso kontrowersne diskusije, w najhóršim padźe samo njedowěra do mediciny.

Naš imunitny system je syć z organow, bańkow, włokninow a rozpušćenych proteinow. Wón škita ćěło před rozbudźakami chorosćow kaž wirami, bakterijemi a hribami kaž tež před škódnymi wobswětowymi wliwami. Samo bańki, kotrež móhli hewak raka zawinować, naš imunitny system spóznawa. Wón wuknje z nazhonjenjow a móže so jara derje wonkownym wliwam přiměrić.