Budyšin (SN/StŠ). Wot spočatka měsaca ma Marxec pjekarski zawod w Budyšinje, ke kotremuž słuša tež znata kofejownja na Póstowym naměsće, noweju šefow. Staj to Sebastian Marx a Luisa Neisser. Mjeztym zo so wón wo wšitko stara, štož ma z pječwom, potajkim chlěbom, całtami a tykancom činić, je wona za nowe ideje a za běrow, potajkim zarjadniske dźěła zamołwita. „Za mnje so poprawom přewjele njezměni, sym wšak hižo w poslednich lětach tu w ćěstarni komando měł. Tak sym zawod wot nana poněčim přewzał. Nětko sym to tež na papjerje, a tohodla njerěka naša pjekarnja tež wjace pjekarnja Dieter Marx, ale pjekarnja Sebastian Marx“, rozkładźe nowy mějićel. Přewjele, tak 38lětny Sebastian Marx, pak na poskitku změnić nochce. „Smy tradiciski zawod, to chcu na kóždy pad dale wjesć. Tohodla kładu wulku wažnosć na to, zo so pola nas kóžda całta a wšo druhe, štož pječemy, z ruku produkuje. Tak je to hižo ze spočatka a tak chcu to tež dale­ wjesć“, młody muž doda.