Slepo (AK/SN). Dokelž je pjenježne po­łoženje Slepjanskeje gmejny dźeń a napjećiše, pyta komuna nětko za móžnosćemi, swoje běžne wudawki redukować. Tole wuzběhuje wjesnjanosta Jörg Funda (CDU) w aktualnej gmejnskej nowinje. Jedna z přičinow je, zo dochody z přemysłoweho dawka woteběraja. Lutować chcedźa mjez druhim při rjedźenju šule, při wobjimje gmejnskeje nowiny a při nadróžnym wobswětlenju.

Při zastaranju z energiju chcedźa po nowych pućach kročić a planuja, na třěše Němsko-serbskeho šulskeho kompleksa fotowoltaikowu připrawu natwarić. „Zaměr je, za šulu, hort a tež za towarstwa, kotrež našu sportownju wužiwaja, dołhodobnje energijowe wudawki znižić“, Funda­ rozłoži. „Nimo toho měła připrawa dalši wužitk za gmejnu přinjesć.“ Energija, kotruž sami njepřetrjebaja, ma so do zjawneje syće dać, štož woznamjenja přidatne dochody.