Wulke starosće při přetwarje Worklečanskeje wyšeje šule
Worklecy (JK/SN). Po lěćnej přestawce zetka so wčera wječor Worklečanska gmejnska rada w tamnišim šulskim horće „Při wódnym mužu“ na posedźenje. Dnjowy porjad bě dosć wobšěrny, wšako mějachu so wjacore nadawki za pokročowanje wohnjoškitneho wukmanjenja tamnišeje šule přepodać. Wjesnjanosta Clemens Poldrak (njestronjan) pak měješe za radźićelow najprjedy raz wostrózbnjacu powěsć. W juliju bu mjenujcy pinca šule přepławjena, z čehož wulka škoda wurosće. Přičina njeběchu twarske dźěła, ale nadměrnje sylne dešće z wulkim mnóstwom spadkow. Nic jenož zo je so wulke mnóstwo wody z wjele pjeršću do rumnosćow pincy zadobyło, nowe tepjenje, ani hišće přizamknjene, poćerpi sobu najwjetšu škodu. Tež hdyž bě wohnjowa wobora hnydom přichwatała a wodu z pincy wuklumpała, wostanje dosć problemow. Tuchwilu fachowa firma rumnosće suša. Cyłkowna trochowana škoda wučinja po słowach wjesnjanosty 350 000 eurow. Zawěsćernja wo škodźe wě a je spěšne a kulantne wobdźěłanje naležnosće přilubiła.
