Wosebje na wsach drje je lědma domjacnosće, w kotrejž njeje domjaceho zwěrjeća. Mjeztym zo so psyk a kóčka poměrnje husto jewitej, su bóle eksotiske zwěrjata skerje rědke. Wo nich a jich plahowarjach na wšelakich městnach Łužicy rozprawjamy w lětnjej seriji Serbskich Nowin. (8)
W Andach, we wyšinach Chile a Peruwa, su wone we wysokosćach nad 1000 metrami žiwe. Ze suchotu a zymnotu nimaja ćeže. „Alpaki žiwja so wosebje wot syna a wody. Su to najmjeńše kamele Andow. Su jara čućiwe, sprawne, socialne a spłóšiwe zwěrjata, a su w stadle žiwe“, powěda ratarka Angela Pötschick z Běłeho Chołmca. Zhromadnje z Marijom Wiesnerom wona hižo wjacore lěta doma alpaki plahuje. Zwěrjata mjenuje luboznje „alpaki Łužiskeje jězoriny“. Započinałoj staj w lěće 2007 z dwěmaj kobłomaj, Amandu a Amaltheju. Do toho běštaj kamerunske wowcy plahowałoj. „Te běchu sčasami chětro wótře. Zo njebychmoj susodow přejara mjerzałoj, smój so za alpaki rozsudźiłoj“, Běłochołmčanaj rozkładujetaj.
