Chrósćicy (SN/MiR). Předewzaće Stolle z Rakec ma puć mjez Kozarcami a Worklecami wutwarić. To je Chróšćanska gmejnska rada wčera wječor na swojim posedźenju jednohłósnje wobzamknyła. Twarski nadawk změje wobjim 87 000 eurow. Za něhdźe dwě do tři njedźele maja so twarske dźěła zahajić a, kaž wjesnjanosta­ Marko Kliman (CDU) na naprašowanje SN rjekny, hišće lětsa wotzamknyć­. To je lětsa jenički dróho­twarski projekt w gmejnje. Puć z Kozarc do Worklec „je skerje pólny puć. Za poslednimi chěžemi njeje asfaltowany, tam je wšitko wujězdźene a próšne“, tak Kliman situaciju rysuje. „Tuž chcemy puć zakładnje wutwarić.“ W běhu zeńdźenja je Kliman radźićelow nimo toho wo aktualnym­ stawje dźěła w pěstowarni „Chróšćan kołć“­ informował. Estrich je mjeztym z potrjechenych wobłukow zwutorhany. To su rumnosće za kubłarki, kuchnja, foyer, garderoby a sanitarne rumnosće. Wjacezaměrowa rumnosć a skupinske rumnosće kaž tež žłobik po dotalnych měrjenjach wot włóžnoty potrjechene njejsu. Zo bychu so zawěsćili a dospołny rozměr škody­ zwěsćili, pak tuchwilu špundowanje wutorhaja.