Serbscy konjacy sportowcy wuhotuja sakske mišterstwo
Hórki (SN/StŠ). Na arealu wokoło Hórčanskeho sportnišća wotměje so wot pjatka zaso jěchanski a skakanski turněr. 33. raz konjace sportowe towarstwo Při Klóšterskej wodźe kónctydźenske wubědźowanje organizuje a přewjedźe. „Wjeselimy so na kónc tydźenja. Změjemy dohromady 21 pruwowanjow w skakanju, přezpólnym jěchanju a dresurje. Za tute je so zaso tójšto sportowcow ze swojimi konjemi přizjewiło. Změjemy nimale 430 startow. To je jara wjele a nas wězo wulce wjeseli. Wšako njewotpowěduje to powšitkownemu trendej“, powěda předsydka Sandra Berndtowa. Lěto wob lěto wabi turněr nic jenož domoródnych jěcharjow do Hórkow. Tež za lětuše wubědźowanja su so konje a sportowcy z druhich zwjazkowych krajow přizjewili. „Woni přijědu z Braniborskeje, Saksko-Anhaltskeje, z Berlina a z Durinskeje k nam do Łužicy. Zwjetša su to stajnje ći samsni, kotřiž přijědu, ale to nam pokazuje, zo tu jako hosćićeljo dobre dźěło wukonjamy.
