Dalšich 8 200 domjacnosćow dóstanje nětko spěšny internet

Kamjenc (SN/MG). Wokrjes Budyšin swoju syć spěšneho interneta spochi wutwarja. Dźěło na tak mjenowanym clusteru dźesać, z kotrymž su wosebje industrijne zawody ze spěšnym internetom zwjazali, su zamołwići nětko zakónčili. Za tónle cluster bě Telekom zamołwita. „Z clusterom dźesać smy wažny dźěl spěchowaneje syće spěšneho interneta w Budyskim wokrjesu zrealizowali“, rjekny społnomócnjeny zawoda za wuchod Němskeje na nowinarskim terminje w Kamjenskim měšćanskim dźiwadle. „Wjace hač 5 300 adresow móže nětko ze spěšneho interneta profitować. Z tym přepodamy staflowy stab kolegam zawoda GlasfaserPlus.“

Předewzaće GlasfaserPlus ma so wo přichodnej wotrězkaj wutwara starać. To stej tak mjenowanej clusteraj 12 a 15. Dalšich 8 200 domjacnosćow ma přistup spěšnej syći interneta dóstać. Za to chcedźa dohromady 350 rozdźělowanskich kašćikow natwarić a 380 kilometrow kabla­ do zemje kłasć.