Měrko Domaška dósta we wólbach wjesnjanosty wjetšinu hłosow

Njebjelčicy (SN/StŠ). Hačrunjež swoje mjeno docyła na wólbnym lisćiku njesteješe, dósta Měrko Domaška ze Serbskich Pazlic wčera w prěnim kole wólbow wjesnjanosty gmejny Njebjelčicy najwjace hłosow. „Z tym njeběch ženje ličił. Třiceći procentow, to bě za mnje realistiske, ale tla nic 46 a k tomu hišće wjace hłosow hač jenički kandidat. To je přemóžace a dźakuju so wšitkim wolerkam a wolerjam“, tak Měrko Domaška dźensa dopołdnja w rozmołwje Serbskim Nowinam powěda.

Dohromady 68 procentow wólbokmanych gmejny, tróšku mjenje hač w poslednich wólbach wjesnjanosty w lěće 2022, je w prěnim kole swój hłós wote­dało. Za jeničkeho kandidata Thomasa Klara z Miłoćic hłosowaše 236 wobydlerjow. Z tym docpě Klar 41,99 procentow.