„Wobšudnistwo spóznać – wěsće jednać“, pod tutym hesłom běchu Radworčenjo předwčerawšim, póndźelu wječor do Radworskeho „Słodeńka“ přepro­šeni. Zarjadowar, tamniši chór Meja, w swojim domicilu w něhdyšej lutowarni prawidłownje přednoški wo ­najwšelakorišich temach wuhotuje.

Radwor (MkWj/SN). Něhdźe 30 ludźi je do „Słodeńka“ přichwatało. Tónkróć běchu sej wobydlerskeho policista Andréja Kobera přeprosyli, zo by ludźom naj­wše­lakoriše wobšudnistwa předstajił, kotrež wšědny dźeń hroža. 49lětny André Kober ze Sernjan skutkuje w Pančicach-Kukowje a je za teritorij gmejnow tamnišeho zarjadniskeho zwjazka zamołwity. Rodźeny Kulowčan, kotryž bě na Bu­dyskim Serbskim gymnaziju maturował, je wot lěta 2024 wobydlerski policist Kamjenskeho policajskeho rewěra. Hłowny nadawk Andréja­ Kobera je dźěło z ludźimi, nan třoch dźěći přitomnym rozłoži. Wopyty w šulach a pěstowarnjach słu­šeja runje tak k tomu kaž styki z młodostnymi. Při tym dźe w prěnim rjedźe wo to, akceptancu a zajim za dźěło policije budźić a wo konsekwencach informować, kotrež su z ranjenjom zakonjow zwjazane.