Radwor (SN/BŠe). Budyski wokrjes chce přirodoškitne pasmo wokoło Łučinskeho hata rozšěrić. W zwisku z naprawu maja so tež ći, kotrychž wona potrjechi, k tomu wuprajić. Wčera su so radźićeljo Radworskeje gmejny z rozšěrjenjom pasma zaběrali a wo tym wotwažowali. Wokrjes ma wotpohlad, tež tamniši Nowy hat a płoniny kołowokoło njeho do pasma zapřijeć. Z rozšěrjenjom pak so wužiwanje płoninow změni. Tak njeje potom hižo bjeze wšeho móžno, puće abo městnosće ponowić. Wšitko ma so ze zamołwitymi přirodoškita wothłosować. Dale njemóža so płoniny hižo za łahodny turizm kaž kolesowanje wužiwać. W naćisku postajenjow krajnoradneho zarjada Budyskeho wokrjesa za přirodoškitne pasmo Łučinskeho hata je w paragrafje 4 dypku 15 mjenujcy podate, zo njeje dowolene, zwonka zjawnych dróhow a pućow z awtami abo e-kolesami jězdźić. Jěchanje abo wodźenje konjow je tam tohorunja zakazane. Dale njeměli ludźo po lěsach a łukach chodźić abo so bjez lajny ze swojim psom wuchodźować. Zdobom je zakazane, taflički abo markěrowanske znački nastajić.