Budyšin (SN/DK). 70lětne stawizny Serbskeho domu w Budyšinje běchu dobra składnosć, jubilej do lětušeho Dnja wotewrjeneho pomnika, wčera, zapřijeć. Zajimcy su so po cyłym domskim w centrje sprjewineho města rozhladowali. Zdobom móžachu wopytowarjo jónu za hewak zawrjenjemi durjemi pohladnyć a serbsku kulturu dožiwić.

Wot 10 do 17 hodź. běchu durje wotewrjene a zastup cyły dźeń dołho darmotny. Zajimcy zhonichu wo dźensnišej zhromadnosći serbskeho žiwjenja za murjemi a wo stawiznach Serbskeho domu. Šulerjo dwanateho lětnika Budyskeho Serbskeho gymnazija su kofej a tykanc poskićeli.