Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (11)

Kopřiwa a kopřiwka wobhladujetej so zdawna jako wulkej hojenskej rostlinje. Nalětnja kura z čajom poruča so přećiwo mučnoće a sprócnoće. Hojenski charakter wulkeje kopřiwy je wědomostnje wopodstatnjeny. Wona zamóže pola artrozy a po najnowšich slědźenjach zdobom při alergijach wotpomhać a k desensibilizaciji přinošować. Za nutřkowne nałožowanje poruča so kopřiwowy čaj z čerstwych abo sušenych łopjenow.

Kedźbu pak, hdyž maće strowotne problemy z wutrobu, edemami abo jěrchenjom. Kopřiwowe preparaty směće jeno z přizwolenjom lěkarja brać.

Mjeztym su dopokazali, zo pomha tradicionelne biće z prućatami kopřiwy přećiwo bolosćam reumy a wiće (Gicht). Za to maš z kopřiwami na bolace městna ćěła bić. Tak njepřijomne kaž palenje kopřiwow tež je, potrjecheni rozprawjeja wo čujomnym wolóženju a mjenje bolosćach.