Z nowym mjenom so dołhe stawizny něhdyšeho zawoda we Wětrowje skónča

Bóšicy (BB/SN). Wot septembra 2025 we Wětrowskej šamotowni hižo njedźěłaja. Nětko ma so tež mjeno bywšeje twornje změnić. To je Bóšičanska gmejnska rada zawčerawšim, wutoru, rozsudźiła. Wona wupraji so jednohłósnje za to, areal wotnětka­ „Wětrowska přemysłowa pře­strjeń“ mjenować. Dotal w zjawnosći hišće njeznaty zajimc chce cyłu ležownosć přewzać a ju we wjacorych dźělach mjeńšim předewzaćelam poskićeć. Hač ležownosće předadźa abo zajimcam přenajeja, tuchwilu scyła hišće jasne njeje. Poslednje podpisma maja w nazymje předležeć.

Dokelž je so Wětrowske sydlišćo w zašłych lětdźesatkach zhromadnje ze šamotownju wuwiło, su tež někotrežkuli kable a roły mjez sobu zwjazane. Tute dyrbi Poickec elektrofirma z Chelna nětko w přichodnych tydźenjach dźělić. Za tele dźěło w hódnoće něhdźe 11 000 eurow je jej gmejnska rada wutoru nadawk přepodała.