Chrósćicy (SN/MWj). Z parkowanjom za čas Božich mšow w Chrósćicach je so gmejnska rada na swojim zašłym posedźenju zaběrała. Wjesnjanosta Marko Kliman (CDU) tule temu w swojich informacijach narěča. Po jeho słowach kemšerjo často swoje awta při muri wokoło kěrchowa wotstajeja. Problematiske je to wosebje na wotrězku pola Dučmanec a wottam do směra na ćěłownju. Hdyž tam awta steja, jězdźidła wohnjoweje wobory abo wuchowanskeje słužby hižo nimo njemóža. Tohodla su wobydlerjo gmejnu prosyli, wobchadne znamješka za zakaz parkowanja nastajić. „Te pak scyła trěbne njejsu, dokelž wuskosć puća parkowanje tak a tak zakaza, wšako njehodźi so pódla parkowaceho awta předpisany wotstawk třoch metrow hižo dodźeržeć“, tak Marko Kliman.