Sulšecy (AK/SN). Na dróze wot Sulšec přez Salow do Kulowa su na asfalće lute wužłobjenja. Wosobowe a nakładne awta jězdźa tam kaž na žołmach. „Kromy su dodźeržane. Dyrbiš-li so tule wuwinyć, móže to strašne być a njezboža zawinować“, měni Sulšečan Gunter Steuer. Runja wobydlerskej iniciatiwje, wjesnej radźe a dalšim wobydlerjam zasadźuje so wón za wutwar štyri kilometrow dołheho puća.

„To je wažna dróha. Mnozy jězdźa po njej do Kamjenca a Wojerec na dźěło, do Kulowa do šule, k lěkarjam, nakupować atd.“, praji wjesny předstejićer Jurij Brösan. Puć do Kulowa su 1969 dotwarili. Hdys a hdys běchu tu mjeńše reparatury. „Ale po nimale 60 lětach je asfalt dodźeržany. Nětko je saněrowanje trěbne“, sej wjesny předstejićer žada. 2018 je Budyski wokrjes puć wot Šunowa do Sulšec ponowił. Sulšečenjo so nadźijachu, zo dźěła pokročuja. Tomu pak njebě. Před lětomaj su swoje žadanje krajnemu radźe přednjesli. Wón chcyše naležnosć pruwować. „Žadamy sej posudźowanje puća a wotmołwu na prašenje, hač je wobšěrny wutwar trěbny abo hač jednore saněrowanje dosaha“, praji Jurij Brösan.