Ćisk (JT/SN). Štomik sadźić symbolizuje nadźiju, zo něšto wostanje a dale rosće. Wot lěta 2010 za Ćišćanske dźěći, kotrež su so předchadźace lěto narodźili, štomiki sadźeja. Minjenu njedźelu su to wospjet sčinili. Nimo swójbow nowonarodźeneju dźěsći wobdźělichu so na małej swjatočnosći w parku dźěćacych štomow tež čłonojo wjesneje rady a dalši wobydlerjo wsy. Janine Sulk je zetkanje na akordeonje hudźbnje wobrubiła.
W krótkej narěči přirunowaše čłonka wjesneje rady Silvana Wigrim wuwiće dźěći z rosćacym štomom. Dźěći runje tak kaž młode štomiki trjebja wjele lubosće a přichilnosće, zo bychu wulke narostłe. Před swojimaj nutřkownymaj wočomaj widźeše wona wjetše dźěći hrajkajo sej pod štomom sedźeć a prěnje čerwjene wišnje chłóšćić. Za to pak dyrbjachu kisału wišninu najprjedy raz sadźić. Tónle nadawk přewzaštaj tradicionalnje nanaj pod kritiskimi wočemi přihladowarjow. Za to bě Brunhilde Richter hižo dźěru wuzběhnyć dała a trěbny grat kaž tež młody štomik spřihotowała. Při štomiku nastajichu dopomnjensku taflu z mjenomaj Karl Krautz a Levi Leander Strehl.
