Nimale tři lěta je Wulkodubrawska gmejna čakała, doniž njeje spěchowanje za nowu Chwaćičansku pěstowarnju dóstała, hačrunjež bě regionalny wuběrk projektej dawno hižo přihłosował. Takle nětko dale póńdźe.

Wulka Dubrawa (UM/SN). Wolóženje njemóhło wjetše być. „Z wulkim wjeselom smy přizwolenje spěchowanja za nowu pěstowarnju w Chwaćicach přijimali“, je Wulkodubrawski wjesnjanosta Hardy Glausch w hamtskim łopjenu gmejny zdźělił. „Twarska naprawa spěchuje so po 90 procentach a w přichodnych lětdźesatkach zastaranje dźěći cyłeje gmejny zaruči.“ Z tym skónči so za komunu dołhi čas napjatosće. Wšako bě Chwaćičanska pěstowarnja jedyn z tak mjenowanych „perspektiwnych projektow“ w zwisku ze strukturnej změnu. To su projekty, kotrymž je regionalny wuběrk drje hižo přihłosował, kotrež pak buchu hišće raz přepruwowane.