Prěnje wubědźowanje wo najsłódnišu marmeladu po cyłej Łužicy

Lubow (SN/MiR). Tołčernja sadu Kekila w Lubowje (Lauba) njedaloko Lubija je mnohim Serbam znata adresa. Wšako je předewzaće jedne z mjeztym rědkich, kiž z płodow priwatnikow brěčku tłóči. Dale je zawod Kekila za to znaty, zo brěčki předawa. Lětsa pak skedźbnja jednaćelka Kathleen Kitsche na nowinku, kotraž ju mjeztym hižo wjacore měsacy přewodźa. „Pobych lětsa jako jurorka na wubědźowanju wo najsłódnišu marmeladu w susodnej Čěskej“, powěda wona wabjo za tajke wurisanje tež we Łužicy, „a mějach to za dobru ideju tež za našu kónčinu.“ Přichodny pjatk, 16. oktobra, wot 16 do 19 hodź. ma so tajke wubědźowanje we wobchodźe Kekila w Lubowje, Při zelenym haju 18 wotměć, a to „drje chětro krótkodobnje“, kaž wona z kuchinskej mišterku Carolu Arnold z Kumwałda připowědźi.