Kupkec konditornja w Kulowje na nowe městno přećahnyła

Kulow (SN/StŠ). Wot zašłeho pjatka nadeńdźeš w Kulowje znatu serbsku Kupkec pjekarnju na nowym městnje (SN rozprawjachu). Swójbny zawod je mjenujcy z Kolpingoweho naměsta něhdźe 300 metrow dale ćahnył, a to na Salowsku 23. „Sym woprawdźe wjesoły, zo je so nam poradźiło, so tule zaměstnić. Tu mamy wšitko, štož trjebamy a štož sym sebi hižo dołho přał“, powěda mějićel pjekarnje Matijas Kupka.

Hdźež běše něhdy Muchec wobchod, so wotnětka całty, chlěby a tykancy pjeku. Hižo dlěje su so Kupkecy za wjetšim domom w Kulowje rozhladowali. „Sprěnja chcychmy po 26 lětach skónčnje něšto swójskeho měć, na Kolpingowym naměsće wšak běchmy na podruž. Nimo toho běchmy tam nastupajo městno jara wobmjezowani. Wšitko, štož smy w ćěstarni napjekli, dyrbjachmy přez dwór nosyć, zo by so prědku we wobchodźe předawać móhło. Nětko mamy dosć městna, wšitko na jednym blaku a chěža słuša tež nam. Potajkim wšo, wo čimž smy sonili, je so zwoprawdźiło.“