Na B 96 mjez Rakecami a Kamjenej wobšěrne twarnišćo předwidźane
Rakecy (UM/SN). Na zwjazkowej dróze B 96 přihotuja dalšu wulku twarsku naprawu, mjenujcy wobšěrny wutwar dróhi mjez Rakecami a wjesnym dźělom Kamjenej. Něhdźe 1 350 metrow dołhi wotrězk njewotpowěduje hižo přiběracemu nadróžnemu wobchadej zašłych lět, posudźuje Krajny zarjad za dróhotwar a wobchad (Lasuv). Tuchwilny staw wutwara je njedosahacy, rěka w planowanskich podłožkach. Hłowna přičina toho je njedosahaca šěrokosć, kotraž wučinja jenož něšto wjace hač šěsć metrow. Dale su w asfalće wujězdźene městna. Tež kromy puća njejsu šěroke dosć, zdźěla tam scyła njewobsteja. Nimo toho steja štomy bjezposrědnje pódla jězdnje. Staw kolesowanskeje šćežki je tohorunja špatny. Tam je asfalt zdźěla rozpukany abo je so korjenjow štomow dla zběhnył.
