Złyčin (CS/SN). Ludźo w Aziji jeho lubuja – rybarjo we Łužicy pak runje tak: trawneho karpa. To je wosebita družina karpow, kiž žeru předewšěm zelene rostliny. Z tym pomhaja rybarjam při hladanju hatow. Karsten Ringpfeil, mějićel hatarstwa w Rakečanskim wjesnym dźělu Stróži, měješe sobotu na rybarskim swjedźenju w Złyčinje wjele prašenjow wo­pytowarjow wotmołwjeć. To je wón rady činił, wšako su wulka ličba wopytowarjow a jich prašenja wotbłyšćowali, zo so ludźo jara za rybarstwo zajimuja. Při Balakec haće woptachu hosćo słódnosće z hornjołužiskeje přirody kaž rybjacu poliwku, karpowy rězk abo pječeń dźiwjeho swinjeća. Při tym přewšo zajimowani wobkedźbowachu, kak rybarjo a jich pomocnicy karpy, šćuki, liny, sumy a dalše družiny rybow z hata wułójichu. Na swojim rybarskim dworje w Stróži Karsten Ringpfeil nimo toho tež jasotry (Stör) z wosebitej picu plahuje. Tule družinu njemóže zhromadnje z druhimi rybami dźeržeć – karpy bychu jasotram wšu picu zežrali.