Salow (AK/SN). Salowski kulturny dom su minjene tydźenje wobšěrnje saněrowali. Při tym ponowichu tepjensku připrawu a izolaciju twarjenja. Tež třěchu su saněrowali. Wo tym město Kulow na swojej internetnej stronje informuje. Naprawa so dźakowano spěchowanju z programa Leader zmóžnja.

Zachod domu je nětko dwurěčnje wuhotowany. Nimo němskeho napisa steji tam serbsce „Kulturny dom Salow“. Dale wuhladaš na sćěnu namolowany młody por při rejowanju. Holca je w narodnej drasće katolskich Serbow. Wobraz je Salowski restawrator Reiner Kokel namo­lował. „Předłohu za to skićeše fotografija mejemjetanja we wsy“, město Kulow w swojej zdźělence rozłoži. „Za tule tradiciju so młodostni we wsy rady serbsku -katolsku swjedźensku drastu wobleku“, tam dale rěka.