Kak serbscy wobchodnicy winowatosć digitalneho płaćenja posudźuja

Budyšin/Berlin. Tuchwilu so w Němskej wo tym debatuje, hač měli ludźo skerje z kartku abo z hotowymi pjenjezami płaćić. Zwjazkowe knježerstwo planuje, zo dyrbja předewzaća wot lěta 2027 znajmjeńša jednu digitalnu móžnosć zapłaćenja poskićeć. Minimalna suma za digitalne płaćenje dotal předwidźana njeje. Doskónčnje wobzamknjene pak tole hišće njeje. Tajkele plany njejsu ničo noweho. Hižo w koaliciskim zrěčenju 2025 běchu so CDU, CSU a SPD dojednali, kupcej při płaćenju swobodu zmóžnjeć. Hotowe pjenjezy měli so jako wšědna forma zapłaćenja zachować, runočasnje ma so krok po kroku znajmjeńša jedna digitalna opcija poskićeć.

Kaž nam Filip Žur z Róžanta a dalši młodostni wobkrućichu, płaća jenož z kartku a hustodosć ani móšnju při sebi nimaja. Jenož jeli je trjeba, z krutymi pjenjezami zapłaćić, woni móšnju sobu bjeru­. Štóž jeničce z kartku abo handyjom płaći, pak nima často hižo přehlad swojich wudawkow, štož móže problematiske być.