Pančicy-Kukow. Poskitk najwšelakorišich wobchodow a posłužbow w Pančicach-Kukowje je so spočatk oktobra rozšěrił. We wsy maja nowy kosmetiski salon. Załožiła je jón Sylwija Smolina, a to na Bělkec ležownosći při puću do Wu­dworja. Na samsnym dworje, na kotrymž Christin Bělkowa hižo nimale 20 lět swójski frizerski salon wjedźe, móžeš nětko w susodnych rumnosćach něšto za swoju rjanosć činić.

Sylwiju Smolinu drje wjele ludźi znaje. Dlěje hač 25 lět je jako lěkarska sotra w Pančičanskej praksy powšitkowneje lěkarki Ingrid Thiele dźěłała. „Po tajkim dołhim času sym so rozsudźiła, nowe puće hić a sej swójski són spjelnić“, wona powěda. Tónle nowy puć je jej tež pomhał, swójski ćežki žiwjenski wosud předźěłać a zaso pozitiwnje na žiwjenje hladać. „Něšto noweho nawuknyć, swoje ideje zwoprawdźeć a něšto swójskeho natwarić bě za mnje wažna móžnosć, nowe perspektiwy nańć a zaso z wjeselom do přichoda hladać.“