Njeswačidło (SN/LR). W domizniskim muzeju w Njeswačidle su njedźelu popołdnju nowu wosebitu wustajeńcu wotewrili. Najnowša přehladka wěnuje so ručnemu dźěłu. Wustajene su najwšelakoriše hóčkowane, plećene abo wušiwane drohoćinki. Najstarši eksponat je wušiwany płat z lěta 1886. Wudźěłki su po temach rjadowane. Do nich słušeja hodowna a nazymska pycha, wudźěłki z wowčeje wołmy, amigurumi (to su małe hóčkowane abo plećene objekty, na př. klanki) a tuneziske hóčkowanje. Tež jutrownje wušiwane jejka móža wopytowarjo přehladki wobdźiwać. Wosebje za dźěći je mnoho bajkowych figurow we witrinje a na kamorach wotpočuja wulke plećene zwěrjata.