Krollec zahrodnistwo we Wudworju zakónči swoje 50. jubilejne lěto
Wudwor (SN/BeW). Kotry adwentny wěnc lětsa blido pyši? Wěsće to hižo? Sće skerje tradicionalny typ abo maće kóžde lěto nowe ideje za adwentnu dekoraciju? Floristka Claudia Lochowa přeradźi, zo su lětsa sekle trend, a to we mnohich wulkosćach a barbach. A wulki comeback kiwa Fröbelowym hwězdam.
W přihotach na tradicionalnu adwentnu wustajeńcu pola Krollec we Wudworju so sobudźěłaćerki hižo w pózdnim lěću z tym zaběraja, što móhli kupcam prezentować. Po swjedźenju wšěch swjatych započina so poprawne dźěło, mjenujcy kreatiwne wuhotowanje, wiće wěncow a wupytanje dekoratiwnych elementow. „Někotři kupcy“, tak powěda nawodnica zahrodnistwa Kerstin Krollowa, „přinjesu kóžde lěto swoje krosno za adwentny wěnc abo rynku za wěnc k nam.“ Florisća, kotřiž su eksperća na tymle polu, potom wěncy wotpowědnje přećam kupcow wobwija a z dekoratiwnymi elementami wudebja. Dypkownje na prěni adwent pyša potom na přikład wukładne wokno pjekarnje w Chrósćicach a druhdźe we wokolinje zahrodnistwa.




