Krótkopowěsće (08.11.19)

Freitag, 08. November 2019
Artikel bewerten
(0 Stimmen)

Myto do Slepoho

Drježdźany. Z temu „Gładźarnica Dźěćetko – Die Schleifer Tracht“ staj Elvira Rathner a Hartmut Hantšo ze Slepoho z 1 500 eurami dotěrowane třeće myto w Sakskim wubědźowanju za domizniske slědźenje dobyłoj. Myto su lětsa dwanaty raz spožčili. Dobyćer dósta 3 000 eurow, druhe městno 2 000 eurow. Hobbyjowym slědźerjam přepodadźa čestne wopisma a knižne dobropisy.

Nowe spěchowanske towarstwo

Smochćicy. Za Dom biskopa Bena za­łožichu přećeljo a spěchowarjo srjedu spěchowanske towarstwo, kotrež ma ku­błan­ske dźěło zarjadnišća podpěrać. Za předsydu su bywšeho rektora dr. Petera-Paula Straubu wuzwolili, za městopředsydku dr. Susannu Hozynu. Widźa swój nadawk předewšěm w tym, być z posołom Domu biskopa Bena w towaršnosći a cyrkwi, kaž dr. Straube wuzběhny.

Do złoteje knihi so zapisał

Budyšin. László Nagy, jedyn z hłownych organizatorow Paneuropskeho piknika před 30 lětami blisko madźarskeho města Soprona, je so we wobłuku swojeho wopyta w Budyšinje wčera do złoteje knihi města zapisał. „Sym přeswědčeny, zo by Europa tež bjez našeho piknika swoju dźensnišu formu docpěła“, rjekny Madźar. Wyši měšćanosta Alexander Ahrens (SPD) přija Nagyja w radnicy.

Pančičenjo derby dobyli

Budyšin. Wolejbulisća Sportoweho towar­stwa Marijina hwězda porazychu w serbskim derbyju na druhim hrajnym dnju wokrjesneje klasy-wuchod Sokoł Budyšin 2:0. Prěnju hru dnja bě Sokoł Budyšin z 0:2 přećiwo štwórtemu mustwu MSV Budyšina přěhrał. W třećej partiji wječora porazy ST Marijina hwězda MSV Budyšin z 2:0.

Gladbach doma wuspěšny

Mönchengladbach. Borussia Mönchengladbach je wčera wječor w europa league AS Rom z 2:1 přewinyła. Wrota za na­čolnika zwjazkoweje koparskeje ligi docpěštaj Marcus Thuram a Federico Fazio,­ kiž třěli samowrota. VfL Wolfsburg přěhra doma přećiwo KAA Gentej 1:3, Eintracht Frankfurt podleža pola Standard Lütticha 1:2.

Veröffentlicht in Krótkopowěsće
Bitte anmelden, um einen Kommentar zu posten

Anzeige