Zastupjer administracije demokratiskeho regiona na wopyće w Budyšinje
Budyšin (SN/MG). Na sewjerje a wuchodźe Syriskeje nasta w lěće 2014 sebjezarjadowany region. Po tym, zo bě so wójsko knježićela Assada zhubiło, wužichu wšelake ludowe skupiny wakuum mocy a wutworichu swójske, decentralne knježerstwo. Khaled Davrisch je najwyši reprezentant „awtonomneje administracije demokratiskeho regiona sewjerowuchodneje Syriskeje“ w Němskej. Zašły tydźeń poby wón na wopyće w Budyšinje.
Nimo rozmołwy w redakciji Serbskich Nowin zetka so wón tež ze zapósłancom Serbskeho sejma Měrćinom Krawcom a jednaćelku towarstwa „Willkommen in Bautzen“ Astrid Riechmann. W rozmołwomaj zwuraznješe, zo chce přichodnje ze Serbami styki nawjazać. Tež Davrisch sam je kurd. Kurdojo bydla bjez swójskeho kraja we wšelakorych statach Bliskeho wuchoda.