SJ Chrósćicy
– TSV Połčnica 5:1 (2:1)
Zestawa domjacych: Teschner – Pöpel (54. Dehn), Schulze, Pohling, Šiman, Bětnar, Runt, Domaška, Šafář, Šmit (75. Hawš), Žur
W seriji bjez poražki zamóchu Chróšćanscy koparjo tež tónraz dale dypkować, a to hižo šesty raz za sobu. Přećiwo Połčnicy docpěchu samo jasny wuslědk. Wot wšeho spočatka woni pokazachu, štó je knjez na domjacym hrajnišću. Zastajachu rumy hłuboko w połojcy přećiwnika a spěšnje nadběhowachu. Tak padny hižo we 8. min. 1:0. Žurowu třělwu zamó wrotar jenož wotplacnyć, Šmit najspěšnišo reagowaše a bul w saku zaměstni. Štyri mjeńšiny pozdźišo hosćićel znowa wyskaše. Pöpel sprintowaše ze srjedźneho pola z bulom hač k šěsnatce, wotpołoži Žurej a tón nisko prěki před wrota k Domašce, kiž kulowatu kožu k 2:0 nisko do kuta sadźi. Na to sćahnychu so domjacy tróšku do defensiwy a dachu tak hižo połmortwemu přećiwnikej tróšku powětra. Koncentracija popušći a lochkomyslne zmylki wjedźechu k 2:1. Domaškowa přihrawka škitarjej njeběše precizna dosć, tak zo jón nadběhowar doběža a njewostaji Teschnerej žanu šansu (42.).