Hrajne zjednoćenstwa nastawaja, hdyž jednotliwe mustwa dosć personala nimaja. Tež pola Pančičanskich a Worklečanskich wolejbulistkow to před třomi/štyrjomi lětami tak bě, a tak wustupowachu wone tři sezony jako hrajne zjednoćenstwo. Nětko pak je wone rozpušćene. Wo tym sportowa redakcija Serbskich Nowin hižo rozprawješe. Jurij Bjeńš je hišće někotre dalše informacije zezběrał.
Štož běchu 2018 załožili, so lětsa zaso skónči. Žónske wolejbulowe zjednoćenstwo ST Marijineje hwězdy a Viktorije Worklecy nastupi w nowej hrajnej dobje jenož hišće jako Viktoria Worklecy a Viktoria Worklecy II. Wobě mustwje budźetej w samsnej stafli hrać. Z kelko cyłkami budźe wona scyła nastajena, dotal hišće jasne njeje. Žro hrajerkow něhdyšeho hrajneho zjednoćenstwa pak wostanje, kaž nam Tereza Wićazowa přeradźi: „Nimale wšitke hrajerki su pola nas wostali a nimo toho přińdu hišće někotre wolejbulistki ze swójskeho dorosta. To změjemy rjanu měšeńcu.“