Zo trenar FC Energije Choćebuz Claus Dieter Wollitz po změnje do 2. zwjazkoweje ligi swoju hrajnu filozofiju změni, drje bě lědma štó wěrił. Přiwšěm je tón abo tamny z hłowu wił, dokelž nochcyše šeftrenar ponižnje do noweje hrajneje klasy hić. Město toho wón přeco zaso wo „atace“ rěčeše. Jasnje Wollitz rjekny, zo je ofensiwna hra zakład atraktiwnych duelow z najwyšej zabawnej hódnotu. A to samo hišće, jako sej 22krótny třělc wrotow předsezony Erik Engelhardt při treningu křižny pask a meniskus torhny a wjacore měsacy wupadny. Trenar wosta swojej hrajnej filozofiji dale swěrny a so nadźiješe, zo móže hač do kónca transferneje doby podobnje strašneho nadběhowarja na klub wjazać. Tole so njeporadźi, a přiwšěm wosta Wollitz při swojej systematice, z kotrejž móžeše trěbnu ličbu dypkow za zachowanje klasy nazběrać.