Wjelelětny wrotar Sokoła Ralbicy/Hórki Chrystof Gloxyn ma swoju prěnju hrajnu dobu jako trenar za sobu. 29lětny rodźeny Ralbičan, kiž bydli w Bretnigu-Hauswalde, měješe do sezony wulki respekt před swojim nowym nadawkom jako nazwučowar, je pak jón wulkotnje zmištrował. Jurij Bjeńš je so z młodym trenarjom rozmołwjał, minjenu sezonu wuhódnoćił a z nim do přichoda pokuknył.
Swoju prěnju sezonu jako trenar Sokoła sy na 6. městnje zakónčił. Kak spokojom sy z tutym zaměstnjenjom.
Ch. Gloxyn: Šeste městno je cyle w porjadku. Byrnjež sej z mustwom do sezony wulki cil stajili, so pod prěnimi třomi zaměstnić, njeběchmy na kóncu wulce zrudni. Wokrjesna wyša liga je ekstremnje wurunana a z jeničkim dypkom wjace bychmy na štwórtym městnje stali.
Kak spokojom sy powšitkownje z wukonom mustwa?
Ch. Gloxyn: Najprjedy raz móžu rjec, zo je nastajenje w nimale kóždej hrě trjechiło. Na bojowniskim polu smy tak a tak přeco hižo jara dobri byli. Hrajersce a taktisce ma kóžde mustwo zawěsće hišće rezerwy, tola w 90 procentach wšěch hrow běch z mustwom tež na tutym polu spokojom.