Pola Sokoła Ralbicy/Hórkow steji kopańca cyle jasnje na prěnim městnje. Delanske towarstwo pak ma tež hišće dalše sekcije: gymnastisku skupinu, wolejbulowy cyłk a kehelerjow. Kehele powaleć pak w towarstwje nětko wjac njebudu. Za přičinami je so Jurij Bjeńš kapitana delanskich kehelerjow Jurja Šimana prašał.
Knježe Šimano, štóž Was znaje, tón zwjazuje z Wami zawěsće přeco dwě wosebitosći. Sće profesionelny plahowar nukli a swěrna duša kehelerjow Sokoła Ralbicy/Hórki. Naposledk mjenowany hobby pak nětko wjac ze sokołskim emblemom wukonjeć njebudźeće. Čehodla?
J. Šiman: Haj, cyle prawje. Pjatk, 29. meje, smy tule sekciju rozpušćili. Minjene lěta smy přeco zaso za hrajerjemi pytali, ale njejsmy nikoho tak prawje přeswědčić móhli. Nimo toho je tójšto kehelerjow najwšelakorišich přičin dla přestało. Nětko so wjac njewudani, nas zbywacych třoch dla cyłu sekciju pola Sokoła Ralbicy/Hórkow zdźeržeć. Nimo toho trjebaš tak a tak znajmjeńša štyrjoch hrajerjow.
Kelko lět sće nětko za Sokoł kule kulał?