Na šestym hrajnym dnju sezony 2025/26 wudoby sej 4. blidotenisowe mustwo muži Viktorije Worklecy jasne dobyće přećiwo cyłkej Zeleno-běłych Halštrow III. Hrajny dźeń minjenu njedźelu, 26. oktobra, w domjacej sportowej hali bě z dobyćom 14:0 po dypkach za domjacych woprawdźity wjeršk aktualneje sezony.

Zo so we Worklecach wuspěšnje blidotenis hraje, je mnohim dosć znate, ale tute 4. mustwo wotrjada blidotenis bu hakle w tutej sezonje załožene a wot sponsora firmy Eldakon podpěrane. Mustwo nasta z wuspěšneho wabjenja za nowymi hrajerjemi k zesylnjenju wotrjada blidotenis w towarstwje Viktorije Worklecy. Z mustwowym nawodu Michałom Nowakom trenuje kóždu wutoru nowy team z talentowanym dorostom blidotenistow swójskeje młodźiny.

Na spočatku sezony sydachu jenož poražki. Bě to ćežki start za tute nowona­stajene mustwo. Worklečenjo přěhrachu přećiwo Łužnicy, Gersdorfej a Lückersdorfej kaž tež swójskej konkurency Viktoriji Worklecy III. Tak wobsadźi mustwo na šestym hrajnym dnju předposlednje městno w 2. wokrjesnej klasy.