To a tamne (11.01.21)
24 hodźin bjez přestawki telefonować chce reporter rozhłosoweho sćelaka 1 Live WDR. Při tym chce moderator Daniel Danger ze znajmjeńša 500 ludźimi rěčeć, kaž nowinarjam přeradźi. „24 hodźin telefonować, před tym mam wulki respekt. Ze swojej přećelku rěču najdlěje 20 mjeńšin při telefonje.“ Zastupnik Němskeho rekordneho instituta chce wusyłanje 21. januara přewodźeć. Wón chce na to dźiwać, zo su rozmołwy z ludźimi „zmysłapołne“.
Konopej zhubiła je žona na awtodróze w Bayerskej. 20lětna transportowaše mebl njepřiwjazany na připowěšaku a ani njepytny, jako tón njedaloko Woringena na jězdnju padny. Za njej jěducy šofer njemóžeše so wuwinyć a nastroj přejědźe. Při tym nasta škoda 2 000 eurow. Hakle, jako žona wotboči, jej malheur napadny. Nětko dyrbi z chłostanjom ličić.
Nominacija kandidatow dla strony w kalamiće
Choćebuz/Budyšin (SN/at). Grodkowski zapósłanc zwjazkoweho sejma dr. Klaus-Peter Schulze (CDU) so wjeseli: Zjězd křesćanskich demokratow wokrjesneho zwjazka Sprjewja-Nysa a měšćanskeho zwjazka Choćebuz je minjenu wutoru Markusa Niggemanna za direktneho kandidata a móžneho naslědnika Schulzy we wólbnym wokrjesu 64 wuzwolił. Prěni termin loni w nowembrje bu přestorčeny. 50 wobdźělnikow je płaćiwy hygienowy koncept dodźeržało. To wotpowěduje aktualnemu třećemu postajenju korony dla w Braniborskej.
Poprawom chcychu strony we wólbnym wokrjesu 156, to je nimo někotrych komunow w zapadnym dźělu cyły Budyski wokrjes, wot jutřišeho swojich direktnych kandidatow nominować. CDU bě sobotu do Wojerowskeje Łužiskeje hale přeprosyła, něhdźe 200 wobdźělnikow bě wotpohladanych, jednaćel wokrjesny zwjazka Budyšin CDU Filip Wjerš zdźěli. Hačrunjež zwjazkowy wólbny zakoń terminowy slěd w přihotach na wólby zwjazkoweho sejma 26. septembra rjaduje, bě wukřik mjez čłonami a wosebje w zjawnosći wulki. Předwčerawšim bu nominowanski zjězd znowa přestorčeny (SN informowachu).
Tójšto njezbožow sněha dla
Berlin (dpa/SN). Sněh a zalodźene dróhi su dźensa rano we wjacorych zwjazkowych krajach njezboža a zaraćene dróhi zawinili. W sewjerorynsko-westfalskim Bonnje stej so wosobowej awće z jězdnje sunyłoj. W Sauerlandskej dyrbjachu wjacorym nakładnym awtam pomhać, kotrež běchu na nahłych dróhach tčacy wostali. W Badensko-Württembergskej je bus po nahłej skłoninje dele zjěł. Po informacijach policije so nichtó njezrani.
Wočakuja serum za šćěpjenje
Berlin (dpa/SN). W zwjazkowych krajach wočakowachu dźensa posyłku seruma předewzaća Biontech přećiwo koronawirusej, cyłkownje 668 000 dozow. Serum chcychu direktnje do 27 centralnych składow krajow dowjezć. Najwjetši dźěl dóstanje na wobydlerjow najbohatši kraj Sewjerorynsko-Westfalska ze 141 375 dozami, najmjenje Bremen ze 4 875. Sakska ministerka za strowotnistwo Petra Köpping (SPD) sej žada, při rozdźělenju šćěpiwa na to dźiwać, hdźe je wosebje wjele starych ludźi.
SPD wo pandemiji wuradźowała
21. sibirski festiwal sněhowych skulpturow na dalokim wuchodźe ...
Žadaja sej Trumpa wotsadźić
Washington (dpa/SN). Hladajo na masiwnu kritiku prócuje so wotwoleny prezident USA Donald Trump po nadběhowanju Kapitola přez swojich přiwisnikow nastatu škodu wobmjezować. W nowym widejowym poselstwje wón namócnosće zasudźa. „Kaž wšitcy Američenjo sym namócnosćow, anarchije a chaosa dla rozhorjeny. Nětko je čas hojenja a wujednanja“, Trump rjekny a zdobom připowědźi, zo chcył zastojnstwo nowemu prezidentej Joewej Bidenej 20. januara porjadnje přepodać.
Krótko do wozjewjenja poselstwa běchu sej wodźacy demokraća kongresa wot republikana Trumpa naškaranych namócnosćow dla žadali jeho hnydom wotsadźić. Předsydka Domu reprezentantow Nancy Pelosi a najwyši demokrat w Senaće Chuck Schumer namołwištaj amtěrowaceho wiceprezidenta Mikea Pencea a čłonow knježerstwa, Trumpa na zakładźe artikla 25 wustawy USA ze zastojnstwa wotstronić. Mjenowany artikl dowola prezidenta pušćić, njeje-li wón kmany, „prawa a winowatosće zastojnstwa wukonjeć“. Tajku deklaraciju dyrbjeli wiceprezident a ministrojo zdźěłać.
DJV zasudźa nadpady na žurnalistow
Washington (dpa/SN). Zwjazk žurnalistow Němskeje (DJV) je rozhorjeny na nadpady tež na němskich žurnalistow w stolicy USA Washingtonje reagował. „Zaso raz so pokazuje, kak jara so přiwisnicy Donalda Trumpa demokratije a nowinarskeje swobody wohladaja, našćuwani wot wotwoleneho prezidenta a jeho ludźi“, rjekny zwjazkowy předsyda DJV Frank Überall nowinarjam. Předsyda dźěłarnistwa ver.di Frank Werneke rěčeše wo „njeakceptabelnym nadpadźe na swobodu nowinarstwa“.
To a tamne (08.01.21)
Hišće za čas telefonata nana do porodneje kliniki je so w bydlenju w Mnichowje dźěćko narodźiło. Muž bě při telefonje rjekł, zo je jeho žona we 38. tydźenju samodruha a zo su so hrona započeli. W tym wokomiku bě w pozadku hižo wukřik dźěsća słyšeć. Hnydom poda so nuzowy lěkar k bydlenju swójby, hdźež nańdźe mać a strowe hólčatko.
Mylnje nuzowe čisło wolił je paduch w jendźelskim měsće Stoke-on-Trent a je tak policiju alarmował. „Smy drje runje najnjezbožownišeju paduchow swěta zajeli“, pisa policija hrabinstwa Staffordshire. Mužej w starobje 49 a 42 lět běštaj so w Stoke-on-Trenće do domu zadobyłoj. Jako so jedyn z njeju na konopej sydny, zazwoni toho mobilny telefon awtomatisce nuzowe čisło policije. Ta móžeše jeju činjenju připosłuchać, doniž njepřijědźe a wobeju njezaja.
Kajku rólu hraje cyrkej w 21. lětstotku?
Smochćicy (SN/bn). „Swědčenje w času – Dynamika křesćanskeho w Drježdźansko-Mišnjanskim biskopstwje“ je hesło lětušeje zymskeje akademije, kotruž tudyša dieceza a Smochčanske kubłanišćo swj. Bena tuchwilu ryzy digitalnje wuhotujetej. Ćežišći zarjadowanja stej znowazałoženje biskopstwa před 100 lětami a prašenje za relewancu cyrkwje w 21. lětstotku.
„Chcemy so lětsa třom bytostnym kajkosćam cyrkwje, potajkim swědstwu, liturgiji a diakoniji wěnować a tele aspekty historisce, aktualnje a na přichod hladajo wuswětlić.“ Takle witaše hłowny organizator dr. Thomas Arnold z Drježdźanskeje katolskeje akademije wobdźělnikow kaž tež referentow na wčerawše zahajenje akademije. Zdobom dźakowaše so Budyskej wotnožce Sakskeho wukubłanskeho a wupruwowanskeho kanala za „technisku administraciju“.
Dobyće Bidena nětko oficialne
Washington (dpa/SN). Joe Biden je nětko tež cyle oficialnje prezidentske wólby USA dobył, kaž amtěrowacy wiceprezident kraja Mike Pence po zhromadnym posedźenju wobeju komorow kongresa zdźěli. Do toho běchu wólbny wuslědk w jednotliwych zwjazkow krajach wobkrućili, štož je po wólbnym zakonju kraja předpisane. To bě zdobom posledni krok do spřisahanja noweho prezidenta. Mnohich skóržbow amtěrowaceho prezidenta Donalda Trumpa přećiwo wuslědkej wólbow dla pak je so proces jara dlijił.
Merkel na klawsurje CSU
Berlin (dpa/SN). Z njewšědnym wustupom zwjazkoweje kanclerki Angele Merkel (CDU) je krajna skupina CSU dźensa w Berlinje ze swojej tradicionalnej zymskej klawsuru pokročowała. Nimo kanclerki běchu zapósłancy tež prezidenta Zwjazkoweje banki Jensa Weidmanna a nawodnicu klimoweje komisije UNO Patriciju Espinosu Cantellano přeprosyli. Koronakrizy dla běchu klawsuru z bayerskeho klóštra Seeon do Berlina přepołožili a jako hybridnu organizowali.
Iran ke kompromisam zwólniwy
Połoženje a nalada zdźěla katastrofalnej
Frankfurt n. M. (dpa/SN). Hospodarske zwjazki a dźěłarnistwa podlěšeny lockdown kritizuja, žadajo sej wjace pomocy stata. Nimo toho wobstawaja na wjace pjenjezach za krótkodźěłacych w gastronomiskim wobłuku. Drobnowikowanje žada sej mjeztym konkretny jězbny plan za znowawotewrjenje wobchodow. A prezident centralneho zwjazka Němskeho rjemjeslnistwa Hans Peter Wollseifer namołwja k spěšnišemu šćěpjenju, zo móhli so bórze zaso do normalneho žiwjenja wróćić. Ekonomojo pak měnja, zo njezměja přiwótřene naprawy kaž pohibowanski radius k zahaćenju dalšich koronainfekcijow žane wulke hospodarske sćěhi. Přiwšěm je połoženje w hospodarskim wobłuku chětro napjate.
