Biden sej dalši stat zdobył
Washington (dpa/SN). Nowowoleny prezident USA Joe Biden je po prognozach tež tradicionalny republikanski stat Arizona za sebje zdobył. Po tym zo běštej to minjeny tydźeń powěsćernja AP a telewizijny sćelak Fox News wozjewiłoj, zdźělištej to wčera wječor tež sćelakaj NBC News CNN. Tak by Biden nětko 290 hłosow wólbnych muži měł. Za dobyće dosaha 270. W staće Georgia wšitke hłosy hišće raz wuličeja. Tež tam bě Biden dobył. Njeliča z tym, zo so na tym něšto změni.
Söder: Wustawoškit zasadźić
Mnichow (dpa/SN). Wustawoškit měł so po słowach bayerskeho ministerskeho prezidenta Markusa Södera (CSU) z demonstracijemi „prěkimyslerjow“ dokładnje rozestajeć. Smy reichsbürgerow w Němskej spočatnje podhódnoćili a dožiwili, kak móže z tajkeje absurdneje myslički chutny strach za stat a za žiwjenje nastać“, rjekny Söder Mnichowskim nowinarjam. Wón so boji, zo móhło so w dźělach prěkimyslerjow něšto podobneho wuwić.
Tež Pólska planuje weto w EU
Znowa rekord koronainfekcijow
Berlin (dpa/SN). Strowotniske zarjady Němskeje su Roberta Kochowemu institutej 23 542 nowokoronainfekcijow w běhu 24 hodźin přizjewili. To je nowy rekordny staw po wudyrjenju pandemije. Dotalny najwyši staw běchu minjenu sobotu z 23 399 padami registrowali. Ličba nowonatyknjenjow je porno wčerawšemu štwórtkej wo nimale 1 700 rozrostła. Hač do dźensnišeho ranja su dalšich 218 smjertnych padow w zwisku z koronawirusom zličili. Cyłkowna ličba zemrětych wučinja mjeztym 12 200.
Sakski ministerski prezident Michael Kretschmer (CDU) widźi w tuchwilnej koronapandemiji strach, zo towaršnosć Němskeje rozpadnje. Eskalacija njesměła dale přiběrać, hewak hrozy hłuboke pačenje kraja, rjekny Kretschmer wčera wječor w sćelaku ZDF. Wón widźi wobrazy z Ameriki, kotrež chcył Němskej zalutować. Zdobom zakituje nowe wobmjezowanja wirusa dla. Strowotniski fachowc SPD Karl Lauterbach je sej wěsty, zo ličby infekcijow dźakowano zawrjenym hosćencam bórze woteběraja.
Ličby prawje rozkłasć
Trittin: Drohe namrěwstwo
Berlin/Karlsruhe (dpa/SN). Bywši wobswětowy minister Jürgen Trittin po wusudźe Zwjazkoweho wustawoweho sudnistwa, wotškódnić mějićelow atomowych milinarnjow, zwjazkowu kanclerku Angelu Merkel (CDU) raznje kritizuje. „To je drohe namrěwstwo chabłaceje politiki knjenje Merkel“, měni politikar Zelenych, kiž bě za atomowy konsens knježerstwa SPD a Zelenych w lěće 2000 zamołwity był. „Hakle wot njeje lěta 2010 přesadźene podlěšenje dźěłoweje doby tutych milinarnjow je koncernam prawo na wotškódnjenje wunjesło.“ Přez „čorne kepsarstwo“ dóstanu koncerny nětko „znajmjeńša miliony, snano samo miliardy za techniku, wo kotruž nichtó wjace njerodźi“.
Atomowa fachowča Zelenych w zwjazkowym sejmje Sylvia Kotting-Uhl ma wusud sudnistwa za „porjadnu plistu“ knježerstwu Němskeje. „To pokazuje njekmanosć zwjazkoweho knježerstwa CDU a FDP w lěće 2011 kaž tež aktualneje wulkeje koalicije, kónc atomoweje energije prawnisce wěsće zwoprawdźić. Wustawowe sudnistwo bě koncernam wjace wotškódnjenja přizwoliło.
To a tamne (13.11.20)
Nakupowanskej wozyčkaj połnej čriji su swědcy na dwórnišću badensko-württembergskeho Klettgauwa našli. Jedna so wo cyłkownje 129 nowych čriji, a to nic w porach, ale jednotliwych. Na někotrych wisachu hišće płaćiznowe taflički. Policija z toho wuchadźa, zo jedna so wo rubiznu. Što pak pakostnicy ze 129 jednotliwymi črijemi chcychu, je wulke prašenje.
Dweju paduchow w kamorje cyrkwje našli su policisća w sewjerorynsko-westfalskim Krefeldźe. Swědk bě podhladny šćerkot słyšał a widźał, kak mužej žonje před Božim domom złoćany předmjet přepodaštaj. Přiwołani policisća móžachu 37lětneju paduchow hišće w cyrkwi zajeć, byrnjež so w kamorje schowałoj. Wobaj staj hižo podobnych njeskutkow dla wospjet zasudźenaj byłoj. Před cyrkwju čakaše 34lětna žona w awće. Jedne z woknow Božeho domu bě rozbite.
Minu Witkojc wopominali
Twarja nowe baterije za awta
Grünheide (dpa/SN). Wjetše a sylniše baterije po nowej technologiji chce ameriski twarc elektriskich awtow Tesla w swojej prěnjej europskej fabrice w Grünheidźe pola Berlina twarić. To je powěsćernja dpa z derje informowanych kruhow zhoniła. Eficientniše a zdobom tuńše baterije su wuměnjenje za to, zo so elektromobilita na masowych wikach poněčim woprawdźe přesadźi. Tesla hižo dlěje na polu nowych baterijow slědźi.
Namócnosće a zranjeni
Waršawa (dpa/SN). Po namócnosćach pólskich nacionalistow a prawicarjow na zakazanym tak mjenowanym pochodźe njewotwisnosće we Waršawje je policija 36 demonstrantow zajała. Při rozestajenjach bě so 35 policistow zraniło. Někotrych z nich dyrbjachu w chorowni lěkować. Policija rěči wo „hotowej bitwje“. Wčera běchu tysacy hooliganow po měsće ćahnyli, byrnjež Waršawski wyši měšćanosta Rafał Trzaskowski pochod zakazał.
Spahn: Lětsa žane swjedźenje
Sobudźěłaćerjo Techniskeho pomocneho skutka (THW) su wčera ...
Müller: Dalši serum trěbny
Berlin (dpa/SN). Zwjazkowy minister za wuwićowu pomoc Gerd Müller je swoje žadanje potwjerdźił, tež chude kraje ze šćěpiwom přećiwo koronawirusej zastarać. Při tym chce docpěć, zo serum fairnje po krajach rozdźěla, kaž politikar CSU powěsćerni dpa rjekny. „Njesměmy na ludźi w lěhwach ćěkancow zabyć. Nam dyrbjało wědome być: Koronawirus přewinjemy jenož po cyłym swěće abo scyła nic.“
Němska podpěruje rozdźělenje šćěpiwa na swěće přez platformu Covax, kotraž wuwiće a sprawne rozdźělenje zapłaćomneho seruma spěchuje. Němska wuwićowa politika je platformje 100 milionow eurow za nakup seruma w 92 wuwićowych krajach přewostajiła.
„Byrnjež nowy serum z Mainza wulke nadźije budźił, stej jeho transport a składowanje jara naročnej, wosebje hladajo na chłódźenje bjez přetorhnjenja. Jedyn serum njebudźe dosahać. Trjebamy dalše šćěpiwa, z kotrymiž móžemy jednorišo wobchadźeć, zo móhli je do wotležanych kónčin dowjezć“, Müller wuzběhny.
Biden sej swoje mustwo zestaja
Washington (dpa/SN). Najebać trajace spjećowanje mějićela zastojnstwa Donalda Trumpa sej wuzwoleny prezident USA Joe Biden swoje knježerstwowe mustwo zestaja. Tak je swojeho wjelelětneho sobudźěłaćerja a dowěrnika Ronalda Klaina za šefa staba w Běłym domje a tak za jednoho z najwažnišich politiskich poradźowarjow powołał, kaž přechodne mustwo Bidena wčera wječor zdźěli. Wón sam rozmołwješe so do toho ze statnymi a knježerstwowymi šefami Japanskeje, Awstralskeje a Južneje Koreje, kotřiž su jemu k dobyću gratulowali.
Demokrata Joewa Bidena běchu minjenu sobotu na zakładźe prognozow medijow za dobyćerja prezidentskich wólbow deklarowali. Trump so dotal spjećuje swoju poražku přiznać. Wón ma so za wopor systematiskeho wólbneho wobšudnistwa, bjez toho zo by za to dopokazy předpołožić móhł. Mjeztym wón we wjacorych statach USA přećiwo wólbnemu wuslědkej skorži, byrnjež jeho republikanojo na runinje senata a Domu reprezentantow wažne wuspěchi docpěli. Na žadanje Trumpa chcedźa w staće Georgia wšitke hłosy hišće raz wuličić.
