Miliony eurow busowym firmam
Berlin (dpa/SN). Po měsacy trajacym zakazu busowych jězbow koronakrizy dla maja busowe předewzaća bórze statnu pomoc dóstać. Za to je Zwjazk w dodatnym etaće 170 milionow eurow zaplanował, kaž wobchadny minister Andreas Scheuer (CSU) na wčerawšej demonstraciji busowych předewzaćelow w Berlinje připowědźi. Zwjazkowy sejm chce prawdźepodobnje přichodny tydźeń wo dodatnym etaće wothłosować. Potom móža wozydłownistwa w juliju pjenjezy dóstać, rjekny Andreas Scheuer.
„Minjene měsacy njejsće swój hłowny dźěłowy grat, bus, wužiwać móhli“, zwurazni zwjazkowy wobchadny minister před Braniborskimi wrotami. Kóšty za kupjene nowe busy pak přiwšěm běchu, a te wudawki chce Zwjazk zarunać. „Tohodla sym dźensa wot zwjazkoweje kanclerki a wot wicekanclera zelenu swěcu dóstał.“ Po informacijach ministerstwa wupłaća zawodam přiražku, hdyž wo to proša.
Tři měsacy po spočatku kontaktnych a pućowanskich wobmjezowanjow koronapandemije dla je tójšto busowych předewzaćow w krizy. Přerězna škoda firmow wučinja poł miliona eurow.
Wótry wołojnik (18.06.20)
Kreatiwne ideje mytowane
Zhorjelc (dpa/SN). Mužakowska lěsna železnica, Zhorjelski hotel Obermühle a Zhorjelski zwěrjenc su dobyćerjo lětušeho mjeztym pjateho inowaciskeho myta „Turizm 2020 we wokrjesu Zhorjelc“. Wone móžachu so mjez 24 požadarjemi w kategorijach „mobilita a infrastruktura“, „gastronomija a hospodowanje“ a „kultura a wólny čas“ přesadźić, kaž turistiski zarjad zdźěli. Jury přisłušachu zastupnicy turistiskich zjednoćenstwow, Žitawskeho narodneho parka a europskeho města Zhorjelca/Zgorzeleca kaž tež Zhorjelskeho wokrjesa a Industrijneju a wikowanskeju komorow Zhorjelc a Žitawa. Sudnicy dźiwachu wosebje na kreatiwnosć projektow.
Mužakowska lěsna železnica móžeše ze swojim projektom „Po geoparku Mužakowskeho zahórka“ přeswědčić. Zhorjelska Obermühle direktnje při kolesowanskej šćežce nad Wódru a Nysu je sej dypki swojeho serwisa a swojeje přikładnosće dla nazběrała. Woboje sej pućowacy a druzy hosćo wosebje waža. Zwěrjenc w Zhorjelcu móžeše na swój originelny projekt z kenguruwami pokazać, kotryž tójšto ludźi přiwabja.
To a tamne (18.06.20)
Krjepjeńčku wosebiteho razu maja wot najnowšeho w baroknej putniskej cyrkwi w Uhldingenje-Mühlhofenje nad Bodamskim jězorom. Kemšerka bě hladajo na dawak desinfekciskich srědkow na mysličku přišła, nastroj w časach koronakrizy tež za swjećenu wodu wužiwać. A tón na samsne wašnje funguje. Zawod w Hornjej Pfalcy tajke nastroje mjeztym samo produkuje, wužiwajo dotalne bjezkontaktne dawaki kečupa a žonopa. Model chcedźa nětko Němskej biskopskej konferency předstajić.
Paniska reakcija pawka dla je w badiskim Kehlu zasadźenje policije zawinowała. Žona bě so pawka swojim w bydlenju nastróžiła a ze strachom wótře zarjejiła. Muž, kiž runje nimo domu dźěše, žonu słyšeše a so starosćeše. Alarmowani zastojnicy pak móžachu pad spěšnje rozrisać. Pawk bě so hižo zminył.
Jurisća pomhaja
Wojerecy (SN/at). Předźěłany naćisk za statne zrěčenje nastupajo serbske naležnosće w Sakskej a Braniborskej je wuběrk wustawa a prawo eksternej dźěłowej skupinje juristow rozłožił. Wo tym wuběrkownicy na posedźenju Serbskeho sejma minjenu sobotu we Wojerecach informowachu, kaž w nowinskej zdźělence gremija rěka. Jurisća zwěsćichu, zo wotpowěduje naćisk modernym narokam mjeńšinoweje politiki.
Dalše wolóženja w Sakskej
Drježdźany (dpa/SN). Sakska planuje dalše wolóženja w koronakrizy. Wone maja z nowym škitnym wukazom wot 30. junija hač do 17. julija płaćić. To je ministerka za strowotnistwo Petra Köpping (SPD) po wčerawšim posedźenju kabineta připowědźiła. Tak maja swójbne zarjadowanja z hač do sto wobdźělnikami zaso móžne być, dotal su na połsta wobmjezowane. Tuchwilu rozmysluja nastupajo winowatosć, při nakupowanju škit za hubu a nós wužiwać. „Smy pak hišće kedźbliwi“, Köpping zdźěli.
Chinska stolica zdźěla zawrjena
Peking (dpa/SN). Po znowawudyrjenju koronawirusa je połoženje w chinskej stolicy Pekingu napjate. Kaž strowotniske ministerstwo informuje, su w měsće dalšich 31 z wirusom natyknjenych zwěsćili. Tak je ličba natyknjenych w metropoli z 20 milionami wobydlerjow wot minjeneho štwórtka na 137 přiběrała. Jako reakciju na wudyrjenje, kotrež započa so minjeny tydźeń na wulkowikach, su zamołwići dźěle města zawrěli. Tež šule wostanu najprjedy raz zawrjene.
Mortwi pomjezneje zwady dla
Z kolesami demonstrowachu dźensa aktiwisća organizacije Extinction ...
Łužicu na „region přichoda“ wuwić
Budyšin (SN/MkWj). Koronakriza njeje dawno hišće přetrata. Wo tym je Budyski zapósłanc CDU w Sakskim krajnym sejmje Marko Šiman přeswědčeny. Tomu drje hakle budźe, je-li zakładna imunita ludnosće docpěta. Tuž měli wšitcy dale disciplinowani předpisy škita před koronu dodźeržeć. To zwurazni Šiman na wčerawšej nowinarskej rozmołwje w Budyšinje. Politika je wužadana wot krizy potrjechenym předewzaćam pomhać.
Hłowny dźěl rozmołwy pak wěnowaše Marko Šiman strukturnej změnje we Łužicy po skónčenju zmilinjenja brunicy. Hladajo na dźensniše wuradźowanje ministerskich prezidentow zwjazkowych krajow z kanclerku Angelu Merkel (CDU) w tej naležnosći a na bližacy so doskónčny rozsud zwjazkoweho sejma wo wotpowědnym zakonju žada sej Šiman lěpše ramikowe wuměnjenja. Jenož tak budźe móžno 10 000 derje płaćenych dźěłowych městnow w energijowym hospodarstwje narunać. Wón chcył wšitko za to činić, zo by so generacija 20- do 30lětnych, kotřiž su Łužicu wopušćili, zaso nawróćiła.
Prěnje wosobinske zetkanje
Berlin (dpa/SN). Po třoch měsacach widejowych a telefoniskich konferencow je so zwjazkowa kanclerka Angela Merkel (CDU) dźensa prěni króć zaso we wulkim kruhu wosobinsce z ministerskimi prezidentami zwjazkowych krajow w Berlinje zetkała. Na wuradźowanjach w kanclerskim zarjedźe rěčachu wo dalšim postupowanju w koronakrizy a wo wjacorych dalšich temach. Tak su ministerscy prezidenća a kanclerka tež zwoprawdźenje wot wulkeje koalicije wobzamknjeneho konjunkturneho paketa, pospěšeny wu-twar mobilnoškričkoweje syće, planowany wutwar cyłodnjowskeho poskitka na zakładnych šulach a přichodne poćahi k Wulkej Britaniskej po brexiće rozjimali.
Dnja 12. měrca běchu so Angela Merkel a krajni šefojo posledni króć wosobinsce zetkali. Dny po tym běchu šule, pěstowarnje, hosćency, bary a dalše zarjadnišća zawrjene. Zjawne žiwjenje womjelkny. Kanclerka a ministerscy prezidenća wuradźowachu po tym telefonisce a na widejokonferencach wo dalšim postupowanju.
Płaćizny energije reformować
Fachowcy žadaja sej tuńšu milinu a wuhlikowy dioksid podróšić
Berlin (dpa/SN). Wot zwjazkoweho knježerstwa zasadźena fachowa komisija poruča wobšěrnu reformu płaćizny energijow. Zo móhła Němska swoje klimowe zaměry docpěć, dyrbjała popłatki a dawki za milinu šmórnyć. Město toho měła „ambicioněrowanu“ płaćiznu za wustork wuhlikoweho dioksida zawjesć. To je komisija we wobłuku monitoringoweho procesa „Energija přichoda“ w swojim dokumenće namjetowała. Reforma płaćizny energije by tež naprawy za klimje neutralny přetwar industrije podpěrała.
Tak komisija mjez druhim namjetuje popłatk za dalewjedźenje wobnowjomnych energijow (EEG), kotryž kóžda domjacnosć přez zličbowanku miliny płaći, kompletnje šmórnyć. Dawk za milinu měł so na najniši niwow po směrnicach Europskeje unije znižić, fachowcy poručeja. To hodźało so srjedźodobnje w dalokej měrje zaso wurunać, hdyž so płaćizna za tonu wustorkowaneho wuhlikoweho dioksida na 50 eurow zwyši. Hišće pobrachowace srědki móhł Zwjazk ze swojeho etata zapłaćić.
