FDP: Wolóženja so lědma wuskutkuja
Skóržba wotstawka dla wotpokazana
Budyšin (SN). Połdrameterski wěstotny wotstawk w zakładnych šulach njedodźeržeć je zakonsce w porjadku, kaž Wyše zarjadniske sudnistwo Sakskeje wčera w Budyšinje rozsudźi. Sudnistwo wotpokaza tak skóržbu wučerki zakładneje šule, kotraž bě přećiwo paragrafej 2 sakskeho škitneho wukaza koronawirusa dla skoržiła. Paragraf postaja, zo njepłaći wěstotny wotstawk 1,5 metrow w šulach a zo maja tam alternatiwne škitne naprawy přećiwo wirusej namakać. Žona měješe tohodla strach natyknjenja za wjetši a swoje prawo na ćělnu njezranitosć za ranjene. Wyše zarjadniske sudnistwo njeje argumentaciju wučerki sćěhowało. Dotal njeje wědomostnje dopokazane, zo su wučerjo přez natyknjenje dźěći wosebje wohroženi, hdyž njeje wěstotny wotstawk dodźeržany. Nimo toho ličba infekcijow woteběra.
Kreatiwna Sakska
„Diplomataj“ zasudźenaj
Drježdźany (dpa/SN). Dweju sobudźěłaćerjow mongolskeho wulkopósłanstwa w Turkowskej je Drježdźanske krajne sudnistwo wčera pašowanja drogow dla po jědnaće lětach jastwa zasudźiło. Chłostanska komora měješe za dopokazane, zo staj mužej w starobje 41 a 48 lět na wšě 70 kilogramow heroina w hódnoće třoch milionow eurow do Němskeje přiwjezłoj. Z wusudom sćěhowaše sudnistwo žadanje statneho rěčnistwa. Prawiznicy wobskorženeju běchu sej do toho žadali jednanje skónčić.
Mužej běštaj so jako diplomat a šofer wudawałoj, jako jeju policisća na awtodróze mjez Prahu a Drježdźanami pola Bad Gottleuby zadźeržachu a kontrolowachu. W jězdźidle z diplomatiskim čisłom namakachu 140 paketow po 500 gramach heroina. Wobaj powołaštaj so na swoju diplomatisku imunitu a twjerdźeštaj, zo njejstaj wo heroinje w awće ničo wědźałoj. „Diplomataj“ pak njeběštaj w Němskej akreditowanaj a njeběštaj w diplomatiskej naležnosći po puću. Jeju prawiznicy skedźbnichu tohorunja na diplomatisku imunitu a připowědźichu rewiziju. Wusud njeje hišće płaćiwy.
To a tamne (12.06.20)
Z psom wopytać smědźa ludźo zwěrjenc w Kamjenicy we wobłuku pospyta, kotryž ma wot přichodneje póndźele hač do kónca lěta trać. Při tym chcedźa zwěsćić, kak wobydlerjo coowa na psy reaguja a hač je to za psy a wobsedźerjow spomóžne. W někotrych coowach su psy dowolene, štož pak zdźěla tež k stresej wjedźe: Mnohim zwěrjatam njejsu psy ničo druhe hač rubježne zwěrjo, a tuž wotpowědnje reaguja.
Tołstu móšeń ze stami eurow a wupokazami su policisća w delnjosakskej gmejnje Wietze w swojim listowym kašćiku našli. Wot njeznateho namakarja wotpołožena drohoćinka słušeše 45lětnemu wikowarjej lodowych tworow, kiž bě móšeń na jězbje z čołmikom zhubił. Zastojnicy muža informowachu, a tón dari na to sto eurow pomocnej organizaciji a policistam wězo lód.
Pawšalu kraj awtomatisce płaći
Z nowym serbskim postajenjom wo zarunanju kóštow rjaduje braniborske knježerstwo přewzaće wudawkow za hłownohamtskich wokrjesnych zamołwitych za naležnosće Serbow přez kraj.
Podstupim (SN/at). Wot 1. januara 2019 płaći po aktualnym braniborskim serbskim zakonju rjadowanje, zo kraj kompletne kóšty personalnych městnow hłownohamtskich zamołwitych za naležnosće Serbow we wokrjesach Sprjewja-Nysa, Hornje Błóta-Łužica, Dubja-Błóta a w bjezwokrjesnym měsće Choćebuzu přewozmje. Na kotrym zakładźe so to stanje, njebě dotal rozrisane. Wakanca zdawa so nachileć, dokelž je braniborske krajne knježerstwo wutoru nowe serbske postajenje wo zarunanju kóštow schwaliło, kotrež bě kulturna ministerka Manja Schüle (SPD) spřihotowała. K dokumentej matej so nětko hišće wuběrk za wědomosć, slědźenje a kulturu krajneho sejma kaž tež Rada za naležnosće Serbow wuprajić. Potom nabudźe wón płaćiwosće, kaž Podstupimska statna kenclija informuje.
Dźěłowe městna wohrožene
Frankfurt n. M. (dpa/SN). Pola lětanskeho předewzaća Lufthansa su tysacy dźěłowych městnow wohrožene. Lufthansa sama rěči wo 22 000 połnych dźěłowych městnach, kiž wokomiknje trěbne njejsu. Zhromadnje z dźěłarnistwami chcedźa nětko za rozrisanjom pytać, kotrež móhli na hłownej zhromadźiznje kónc junija předpołožić. Koronakriza je Lufthansu ze 138 000 sobudźěłaćerjemi nimale dospołnje zlemiła.
Maas plany Israela kritizował
Jerusalem (dpa/SN). Zwjazkowy wonkowny minister Heiko Maas (SPD) je na swojim wopyće w Israelu planowanu aneksiju palestinskich kónčin jako ranjenje prawa zasudźił, hroženjow abo konsekwencow pak so wón wzda. Město toho zasadźi so za to, přetorhnjene direktne rozmołwy mjez Israelom a Palestinjanami wo rozrisanju konflikta na Bliskim wuchodźe wožiwić. Israel chce sej po „měrowym planje“ prezidenta USA Donalda Trumpa třećinu palestinskeho Kraja zapadnje Jordana přiswojić.
Žada sej ekologisku změnu
W zwisku z protestami přećiwo rasizmej w USA su demonstranća w ...
Pólska swoju mjezu zaso wotewrje
Waršawa (dpa/SN). Pólska chce swoju mjezu k tamnym krajam Europskeje unije 13. junija zaso wotewrěć. To ma pomhać pólske hospodarstwo znowa wožiwić, rjekny ministerski prezident Mateusz Morawiecki wčera we Łochowje wuchodnje Waršawy. Mjezynarodne lěty budu wot 16. junija zaso móžne. „Na tónle wokomik smy wšitcy čakali. Wobmjezowanja w zwisku ze zawrjenjom mjezy běchu mnohim Polakam jara njepřijomne, tójšto branšow našeho hospodarstwa je chětro ćerpjeło.“
Srjedź měrca bě narodnokonserwatiwne knježerstwo jako škitnu naprawu přećiwo rozšěrjenju koronawirusa mjezu Pólskeje za wukrajnikow zawrěło. Wuwzaća płaćachu jeno za tych ludźi, kotřiž stajnje w kraju bydla, za šoferow nakładnych awtow a za diplomatow. Polacy, kotřiž so z wukraja nawróćichu, dyrbjachu do 14 dnjow trajaceje karanteny. Tute rjadowanje bě wosebje powołanskich dojězdźowarjow podłu pólsko-němskeje mjezy trjechiło. Za nich su hakle pozdźišo wuwzaćne rjadowanja wukazali.
Němska delegacija w Ruskej
Moskwa/Frankfurt n. M. (dpa/SN). Němske hospodarstwo je najebać koronakrizu prěni wuwzaćny lět delegacije do Moskwy zwoprawdźiło. Wodźacy němscy a europscy předewzaćeljo su minjenu nóc w Moskwje přizemili, kaž nawoda němsko-ruskeje wikowanskeje komory Matthias Schepp powěsćerni dpa zdźěli. Po jeho informacijach bě ruske knježerstwo w Moskwje lětanskemu předewzaću Lufthansa dowoliło, managerow do Ruskeje přiwjezć.
Ruske hospodarstwo tči we hłubokej krizy. Prezident Wladimir Putin, kiž so wosebje na němske inwesticije nadźija, je wukazał hospodarstwo zaso natwarić. „Němska bě, je a wostanje najwuznamniši hospodarski partner Ruskeje w Europje“, Schepp rjekny. Wón apeluje na knježerstwje w Berlinje a Moskwje, normalne hospodarske jězby předewzaćelow ručež móžno zaso dowolić. Ruska bě w boju přećiwo koronapandemiji swoju mjezu kónc měrca zawrěła. Nawrót k normalnemu lětadłowemu wobchadej mjez Němskej a Ruskej njeje wotwidźeć. Němske firmy su loni wjace hač dwě miliardźe eurow w Ruskej inwestowali.
