Za zhromadne šule so wuprajili
Chrósćicy (SN). Štyri dny po swojim konstituowacym posedźenju je so nowa Rada za serbske naležnosće w Sakskej wčera prěni króć w Chrósćicach schadźowała. Kaž z nowinskeje zdźělenki gremija wuchadźa, wuradźowachu radźićeljo mjez druhim wo namjeće knježerstwoweje koalicije nastupajo zhromadne šule a wo prašenju wutworjenja dweju rjadownjow 5. lětnika w Ralbicach a Worklecach.
Serbska rada wita namjet koalicije wo zhromadnych šulach, kotryž zmóžnja tajke přichodnje tam wutworić, hdźež su wuměnjenja date. W zmysle fleksibelnišich šulskich strukturow skići to wjace móžnosćow, šule wotpowědnje potrjebje na městnje wuhotować.
Hladajo na wyšej šuli w Ralbicach a Worklecach podpěruja radźićeljo zhromadne stejišćo wobeju kubłanišćow, jeju nošerjow kaž tež dalšich serbskich akterow, kotřiž sej žadaja, zo matej so na woběmaj šulomaj dwě rjadowni 5. lětnika w šulskim lěće 2020/2021 wutworić. By-li na jednym městnje jeničce jedna rjadownja była, so rada boji, zo so wěsta ličba šulerjow ze serbskeje šulskeje syće zhubi a na wokolne šule woteńdźe.
Za sudnika z wuchoda
Podstupim (dpa/SN). Braniborski ministerski prezident Dietmar Woidke (SPD) žada sej zhromadnje ze swojim předchadnikom Matthiasom Platzeckom, zo wuzwola wuchodoněmskeho sudnika do Zwjazkoweho wustawoweho sudnistwa w Karlsruhe. Za zastojnstwo namjetujetaj Jesa Möllera, sudnika na Berlinsko-braniborskim krajnym socialnym sudnistwje. W Greifswaldźe rodźeny Möller bě wot 2012 do 2019 prezident Braniborskeho wustawoweho sudnistwa. Zwjazkowa rada chce pjatk naslědnika rozžohnowaceho so sudnika wolić.
Korona w Běłym domje
Washington (dpa/SN). Prezident USA Donald Trump nima najnowše pady koronainfekcijow w Běłym Domje za problem. Zdobom je wón wukazał, zo maja sobudźěłaćerjo knježerstwoweje centrale škit za hubu a nós nosyć. Wón sam a wiceprezident Mike Pence staj wot toho wuwzataj. Knježerstwo ma situaciju „jara derje pod kontrolu“. Najnowše infekcije njejsu dopokaz, zo wěstotne naprawy njefunguja. „To móže so stać.“
W lokalach a z listom wolić
Tójšto pućowanskich busow je dźensa w Mnichowje po puću było. ...
Wirtuelnje so předstajiła
Drježdźany (dpa/SN). Sakska ministerka za europske naležnosće Katja Meier (Zeleni) je minjeny pjatk pólski partnerski delnjošleski region wirtuelnje wopytała a so tak w swojej funkciji jako ministerka w časach koronapandemije předstajiła. Na widejowej konferency z wicemaršalom Delnjeje Šleskeje Michałom Bobowiecom dźěše wo europski projekt přichoda, kotryž ma mjezu překročacu strukturu kolesowanskich šćežkow polěpšić. Kaž ze zdźělenki sakskeho ministerstwa za justicu, demokratiju, Europu a runostajenje wuchadźa, diskutowaštaj Meier a Bobowiec wo iniciatiwje, fachowcow kolesowarskeje infrastruktury a kolesowarskeho turizma lěpje mjez sobu splesć. Zaměr je, mjezy překročace kolesowarske zwiski wutwarić a tak turizm w němsko-pólskim pomjeznym rumje spěchować. Při tym chcedźa tež čestnohamtske towarstwa a zwjazki zapřijeć.
Čakaja na nadrobne rjadowanja
Drježdźany (dpa/SN). Sakscy hotelownicy a hosćencarjo čakaja po připowědźenych wolóženjach naprawow koronakrizy dla na nadrobne předpisy a směrnicy. Te chcyše sakske krajne knježerstwo w běhu dnja zdźělić. „Čas nam ćěka“, rjekny hłowny jednaćel branšoweho zwjazka Dehoga Axel Klein.
Minjeny tydźeń bě knježerstwo připowědźiło, zo smědźa hotele, hosćency a kofejownje 15. meje zaso wotewrěć, a je prěnje směrnicy mjenowało: Tak dyrbi mjez blidami 1,50 metrow wotstawka być. Tež hygieniske předpisy maja so dodźeržeć. Powołanske drustwa su mjeztym brošurki wudali, kotrež móža hosćencarjo hač do pjatka wužiwać. Hladajo na wotewrjenje pěstowarnjow a zakładnych šulow 18. meje maja rjadownje a pěstowarske skupiny konsekwentnje dźělene być. Tak móhli w padźe korony skupiny spěšnje testować a do karanteny pósłać. Po wukazu knježerstwa, kotryž wot 18. meje płaći, budu potom tež zaso zhromadźizny bjez wobmjezowanja ličby wobdźělnikow dowolene.
Merkel radźi ke kedźbliwosći
Widejowa konferenca prezidija CDU – Wöller protestow dla znjeměrnjeny
Berlin/Drježdźany (dpa/SN). Hladajo na přiběrace demonstracije přećiwo wobmjezowanjam koronakrizy dla zwjazkowa kanclerka Angela Merkel (CDU) namołwja, kedźbliwje z pandemiju wobchadźeć. Jej su rozprawjeli, zo bě minjeny kónc tydźenja tójšto ludźi bjez škita za hubu a nós nakupować było, rjekny Merkel po informacijach powěsćernje dpa na wčerawšej widejowej konferency prezidija CDU. Zdźěla su so ludźo z tym samo hišće hordźili. „Přiwšěm přeco hišće płaći, zo měł kóždy płaćiwe rjadowanja dodźeržeć.“
Angela Merkel na to pokaza, zo budźe hakle za dwaj abo tři tydźenje widźomne, kak so minjeny tydźeń wobzamknjene wolóženja koronanaprawow na ličbu infekcijow wuskutkuja. Nimo toho wona připowědźi, zo chcyła jutře w zwjazkowym sejmje při woprašowanju knježerstwa znowa rozłožić, z kotrymi ličbami zwjazkowe knježerstwo wuwiće pandemije posudźuje a zastopnjuje. Kanclerce a zwjazkowemu knježerstwu běchu naposledk wumjetowali, zo z rozdźělnymi měritkami ludźi zamyla.
Njespokojnosć móhła přiběrać
Berlin (dpa/SN). Přiwisnicy teorije zapřisahańcy su temu koronawirus po měnjenju nawody zwjazkoweho kriminalneho zarjada Holgera Müncha „dźakownje přiwzali“. W prěnich tydźenjach pandemije njeje so widźomnje wjace tajkich wobsahow jewiło, rjekny Münch w Berlinje. Přiwšěm hraješe koronawirus stajnje wulku rólu. Jako pak dóńdźe k prěnim demonstracijam přećiwo naprawam, su akterojo prawicarskeho spektruma spytali protesty byrgarskeho lěhwa, kotryž pod naprawami wirusa dla ćerpi, tematisce wobsadźić, Münch potwjerdźi. Hač so demonstracije na woprawdźity problem wuwija, wotwisuje wot toho, w kotrej měrje akceptanca ludźi za naprawy dale woteběra, a wot prašenja, hač dóstanje wulka ličba wobydlerjow kraja woprawdźity hospodarski problem.
Zo njebychu protesty kritiski rozměr docpěli, dyrbjeli ludźi bóle informować – wo koronawirusu kaž tež wo móžnosćach hospodarskeje podpěry. Njespokojnosć njeje hišće tak wulka kaž w časach krizy ćěkancow dla. Za bjeze wšeho móžne pak Holger Münch ma, zo dóńdźe k podobnemu wuwiću kaž tehdy.
To a tamne (12.05.20)
Direktnje před policajskej stražu parkowała je wopita šoferka awta w schleswigsko-holsteinskim Preetzu. Do toho bě wona tam do płotu zrazyła. To wusłyšawši dźěchu zastojnicy policajskeje straže pohladać: 30lětna měješe 1,65 promilow alkohola w kreji. Jězbnu dowolnosć a klučik awta jej tuž najprjedy raz wotewzachu.
Trójce do karanteny dyrbjał je młody Italčan koronapandemije dla. 22lětny Lorenzo Di Berardino bě spočatk lěta jako student wjacore měsacy w chinskim Wuhanje. Něšto dnjow do planowaneho wotlěta do domizny tam město zawrěchu. Po tym zo bě so w februaru z lětadłom do Italskeje dóstał, dyrbješe 17 dnjow do karanteny. Jako so na to do ródneje wsy w centrumje kraja nawróći, je knježerstwo za cyłu Italsku korony dla wukazało, zo njesmědźa ludźo swoje domy wjac wopušćić.
Zhromadny dom škitać
Rom/Vatikan (B/SN). „Rozestajachmy so z prašenjemi, kotrež cyrkej po cyłym swěće zaběraja. Tři tydźenje intensiwneho wuradźowanja leža za nami“, hódnoći kardinal Reinhard Marx njedawnu wurjadnu zhromadźiznu w Romje. Bamža Franciskusowa encyklika Laudato si a jeje wizije „zhromadneho domu“ stejachu w srjedźišću. Biskopska synoda je jasnje podšmórnyła, zo je najwjetši čas „Zhromadny dom“ zemje škitać. Synoda je mjezynarodnej zjawnosći pokazała, kak dramatiske połoženje Božeje stwórby je. Zamołwitosć za „zhromadny dom“ ma wšitke generacije starać.
Krajny biskop zapokazany
Kwota zaso přiběrała
Berlin (dpa/SN). Kwota natyknjenjow z koronawirusom je w Němskej po informacijach Roberta Kochoweho instituta na 1,13 přiběrała. Statistisce to rěka, zo kóždy natyknjeny wjace hač jednu dalšu wosobu natyknje. Nowe ličby běchu dźensa tež tema wuradźowanjow zwjazkoweje kanclerki Angele Merkel (CDU) z čłonami t. mj. koronakabineta. Wo wuslědkach a móžnych naprawach chcychu w běhu dnja informować.
Dalše wolóženja płaćiwe
Paris (dpa/SN). W Francoskej, Španiskej, Belgiskej, Nižozemskej a dalšich krajach su dźensa wšelke wobmjezowanja koronapandemije dla zběhnyli. Španiska a Belgiska běštej wot pandemije sobu najbóle potrjechenej. W Francoskej smědźa ludźo po wosom tydźenjach bjez pisomneje dowolnosće a wosebiteje přičiny swoje bydlenje zaso wopušćić. Po wšej Europje je so wjace hač 1,5 milionow ludźi z koronawirusom natyknyło.
Jednaja wo zrěčenju brexita
