Berlin (dpa/SN). Zwjazkowy sejm je dźensa dalše naprawy wobzamknył, zo by wuskutki koronapandemije złahodnił. Minister za strowotnistwo Jens Spahn (CDU) bě wotpowědny naćisk předpołožił. Tak chcedźa wjace ludźi na koronawirus testować, zo bychu předewšěm hladarjow a hladanja potrěbnych lěpje škitali. Nimo toho maja lěkarjo a labory přichodnje wobšěrnišo informować, tež negatiwne pady korony a ličbu wustrowjenych.
Paket ministra za dźěło Hubertusa Heila (SPD) předwidźi, wěsty čas wjace pjenjez za krótkodźěło płaćić kaž tež bjezdźěłnostny pjenjez dlěje płaćić.
Dźensa wočakowachu nimo toho wuslědk trochowanja fachowcow nastupajo dochody stata za čas koronapandemije. Financni eksperća z tym liča, zo dochody stata prěni króć po lěće 2009 zaso widźomnje woteběraja, a to hač do 100 miliardow eurow.
Berlin/Podstupim (dpa/SN). Wuchodoněmscy zapósłancy SPD so za to zasadźeja, bywšeho prezidenta braniborskeho wustawoweho sudnistwa Jesa Möllera za noweho sudnika Zwjazkoweho wustawoweho sudnistwa powołać. „Jeho dźělena biografija a nazhonjenja z represalijemi diktatury SED wótřa jeho wid na trěbne fungowanje prawniskeho stata“, rěka we wčerawšej zhromadnej deklaraciji wuchodoněmskeje krajneje skupiny SPD w frakciji zwjazkoweho sejma. „Tohodla by lochkomyslne było wuchodoněmskeho nazhonjenja, ze změnami wobchadźeć, so wzdać“, zapósłancy pisaja.
Braniborski ministerski prezident Dietmar Woidke (SPD), amtěrowacy prezident Zwjazkoweje rady, bě Jesa Möllera za zastojnstwo namjetował. Nawjedowacy sudnik Berlinsko-braniborskeho krajneho socialneho sudnistwa bě hač do lońšeho prezident Braniborskeho wustawoweho sudnistwa. Za čas NDR bě wón duchowny a přisłušnik cyrkwinskeje opozicije. Lěta 1989 je Möller do SPD zastupił a studowaše na to prawnistwo.
Drježdźany (dpa/SN). Sakska chětro chwata wobmjezowanja wšědneho žiwjenja koronawirusa dla zběhnyć. Wjacore za přichodny tydźeń připowědźene wolóženje płaća tu hižo wot jutřišeho, kaž krajne knježerstwo zdźěla.
Po najnowšim wukazu koronawirusa dla smědźa dźiwadła, kina a kupjele pod hołym njebjom hižo jutře zaso wotewrěć. Poprawom bě to hakle wot póndźele, 18. meje, planowane. Spočatnje smědźachu jutře jeno dźěle gastronomije a hotelow zaso dźěłać. We wuwzaćnych padach smědźachu ludźo tež swojich přiwuznych w starownjach a hladarnjach zaso wopytać. Pěstowarnje a šule pak wotewru přiwšěm hakle póndźelu.
Z nócnym lěhwowym wohenjom w lěsu je porik w Troisdorfje pola Bonna zasadźenje policije zawinował. 38lětna žona a jeje 40lětny přewodnik chcyštaj swojemu nócnemu zetkanju tak „romantiski raz“ spožčić. To pak so dospołnje nimokuli: Swědk je, kur wuhladawši, policiju kaž tež wohnjowu woboru informował. Policisća podusychu płomjenja z hašakom, kotryž mějachu w awće. Porik twjerdźeše, zo měješe woheń pod kontrolu a za nuzowy pad blešu wody k rukomaj.
Energiju hudźbnikow zwobraznili su slědźerjo Drježdźanskeho Fraunhoferskeho instituta. Za to su instrumenty a dirigenta z wosebitej kameru filmowali, kotraž na ćopłotu reaguje. Wuslědk je tež wědomostnikow překwapił. Tak móže so hubnik trompety hač do 30 stopnjow woćoplić. Projekt słuži předewšěm modernym wabjenskim zaměram.
Rada Załožby za serbski lud je wčera prěni raz we wobłuku telefonoweje konferency wuradźowała. Sćěhi koronapandemije běchu gremij nuzowali, na turnusowym nalětnim posedźenju nowe komunikaciske puće kročić.
Budyšin (SN/at). Załožbowa rada je wčera wotličenje hospodarskeho lěta 2019 wobzamknyła. Direktor załožby Jan Budar k tomu rozłoži, zo su loni z nalutowankow mjenje srědkow wužiwali, hač bě planowane. Z rezerwu móžachu lońši etat wurunać. Přičiny běchu wudawki za tarifowe stopnjowanja a dalše stupace kóšty. Wšako připokazanki z aktualneho financowanskeho zrěčenja 2016–2021 wot lěta 2019 hižo njedosahaja, zo by załožba swój zaměr spjelniła, kaž informuje.
Berlin (dpa/SN). Mějićeljo pućowanskich běrowow a zarjadowarjo jězbow su dźensa w Berlinje a dalšich městach za lěpšu statnu pomoc w koronakrizy demonstrowali. Korso awtow a busow poda so wot Olympiskeho stadiona ke kanclerskemu zarjadej. K demonstraciji namołwjała bě Alianca samostatnych pućowanskich předewzaćow. Zhromadnje z druhimi zwjazkami žada sej wona wosebity fonds Zwjazka, zo móhli běrowy ludźom pjenjezy za storněrowane jězby wupłaćić.
Chodźa zaso do zawodow
London (dpa/SN). Po nimale dwěmaj měsacomaj krutych wobmjezowanjow su dźensa mnozy ludźo w Jendźelskej zaso do zawodow na dźěło šli. Knježerstwo bě připowědźiło, zo měli ći, kotřiž njemóža doma dźěłać, zaso do předewzaćow hić, wosebje industrijni dźěławi. Premierminister Boris Johnson bě njedźelu w narěči namołwjał so zjawnych wobchadnych srědkow wzdać. Fachowcy maja wolóženja za přezažne a njerjadowane. Wulka Britaniska ma najwjace smjertnych woporow koronawirusa dla.
Dale wot doma dźěłać
Berlin/Brüssel (dpa/SN). Zwjazkowy kabinet je dźensa wo tym wuradźował, kak měło po 15. meji z kontrolemi na mjezach k susodnym krajam dale hić. Zwjazkowa kanclerka Angela Merkel (CDU) bě wčera we wobłuku telefoniskeje konferency frakcije CDU/CSU w zwjazkowym sejmje nadźiju šěriła, mjezu poněčim zaso wotewrěć. Jej je wažne, tak cituje ju powěsćernja dpa, zo kontrole koronapandemije dla „hač do wěčnosće“ njetraja.
Kontrole na mjezy k Awstriskej, Šwicarskej, Francoskej, Luxemburgskej a Danskej su hač do 15. meje wobmjezowane. Do Němskeje zapućować smě jenož, štóž ma wažnu přičinu. Zwjazkowy nutřkowny minister Horst Seehofer (CSU) chce zajutřišim, pjatk, wozjewić, kak ma po 15. meji na mjezy dale hić.
Komisija EU chcyše dźensa tohorunja plan nastupajo kedźbliwe wotewrjenje nutřkownych mjezow w Europje předpołožić. Po naćisku, kotryž powěsćerni dpa předleži, chcedźa kontrole krok po kroku wotstronić. Komisija pokazuje w swojim dokumenće na wažnosć swobodneho pućowanja – je dźě pandemija pućowansku branšu wosebje ćežko trjechiła, runje tak wobydlerki a wobydlerjow.
Choćebuz (dpa/SN). Krótkodobnje dowolenu demonstraciju prawicarskeho towarstwa „Zukunft Heimat“ přećiwo wobmjezowanjam koronawirusa dla w Choćebuzu su wčera wječor rozpušćili. Na zarjadowanje na Starych wikach je jasnje wjace hač dowolene 50 ludźi přišło, zdźěli rěčnica policajskeje direkcije. Wobdźělnicy njejsu tež mjezsobny wěstotny wotstawk dodźerželi. Policija nawodu demonstracije na to namołwi, zeskupjenje rozpušćić. Po tym je tójšto ludźi ze swojim „wuchodźowanjom“ na druhich městnach pokročowało. Kaž policija informuje, je personalije něhdźe 60 wobdźělnikow zwěsćiła. Jim hrozy chłostanje ranjenja wukaza wo wobmjezowanjach dla.
Po braniborskich wukazach koronawirusa dla su zhromadźizny zasadnje zakazane. Zarjadowanja z hač do 50 wosobami su pod wěstymi wuměnjenjemi wuwzaćnje móžne, hdyž su na přikład směrnicy škita před infekcijemi dodźeržane. Po spočatnym zakazu přez policiju běchu organizatorojo demonstraciju na zarjadniskim sudnistwje přesadźili.