Kulowscy koparjo w času koronakrizy (1. dźěl)
Sportowy fotograf Werner Müller z Radworja je minjene dny někotrym koparjam kaž tež trenarjej DJK Módro-běłych z Kulowa štyri prašenja stajił. Jednotliwe wotmołwy na prašenja z wobrazami Kulowskich hrajerjow wam tule podamy.
(1) Kak sće so w minjenym času fit dźeržał?
(2) Sće w minjenymaj měsacomaj kontakt z kolegami měł?
(3) Što sej za přichod přejeće?
(4) A čeho nadźijeće so hladajo na mustwo a towarstwo?
Bjarnat Korch
(1) Dwójce abo trójce wob tydźeń jědu dołhu čaru z kolesom abo jogguju. Najčasćišo sym sam po puću, druhdy stej tež mandźelska a dźowka pódla.
(2) Z trenarjom Detlefom Scholzu sym časćišo telefonował. Jónu so tež zetkachmoj, zo bychmoj wažne wěcy rozrěčałoj. K tamnym hrajerjam mějach zwisk z pomocu whatsapp-skupiny. Minjenu wutoru smy so po dołhim času wšitcy zaso widźeli, smy běhali a na stacijach trenowali.
(3) Nadźijam so, zo nas bórze zaso normalita dosćehnje, zo móžemy prawidłownje trenować a kopańcu hrać. W prěnim rjedźe pak sej přeju, zo wšitcy strowi wostanjemy.
Pozdźišo so wubědźować
38. sokołski wolejbulowy turněr wo pokal Domowiny přestorča
Nimale hač do kónca su so serbske Sokołki a serbscy Sokoljo prócowali, 38. sokołski wolejbulowy turněr wo pokal Domowiny tola hišće přewjesć móc. Wšitke durčka pak wostachu zawrjene. Nětko dyrbja wubědźowanje wotprajić a přesunyć. Jurij Bjeńš je so z rěčnikom Serbskeho Sokoła Janom Hrjehorjom rozmołwjał.
Sobotu, 16. meje, dyrbješe so w Radworju při wysokim saku wo pokal Domowiny hrać. Turněr pak znatych přičin dla njebudźe. Kak Sokołki a Sokoljo z tym wobchadźeja?
J. Hrjehor: Sportowy swět so přiwšěm dale wjerći. Tajki zakaz hraća dźě njeje někajki ćežki foul z někajkim ćežkim zranjenjom. Mamy hišće dlěje hač poł lěta chwile turněr přewjesć. Snano jón tež hišće pozdźišo přewjedźemy, hrać pak budźemy.
Pod hołym njebjom směmy zaso sportować, hygieniske naprawy pak dyrbimy wšudźe dodźeržeć. By to móžno było?
J. Hrjehor: Na wězo, wonka pod hołym njebjom hrać je na kóždy pad opcija. Wo njej smy tež hižo w předsydstwje wuradźowali a sej koncept zdźěłali.
A čehodla to nječiniće?
Hnydom 23 koparjow Sokoła Ralbicy/Hórki je so zašły pjatk na ...
Broschinski póńdźe k Borussiji
W přichodnej hrajnej dobje dyrbi so regionalny koparski ligist FC Energija Choćebuz słužbow nadběhowarja Moritza Broschinskeho wzdać. 19lětneho ćehnje po tučasnje přetorhnjenej sezonje do Poruhrskeje. Tam je wón pola druheho mustwa Borussije Dortmund (BVB) zrěčenje na dwě lěće podpisał.
Zamołwići BVB su sylneho nadběhowarja hižo w dorosće wobkedźbowali, jako hraješe wón za Energiju w zwjazkowej lize. Pola Borussije Dortmund su zamołwići z nowopřichadom z Łužicy spokojom. Na homepage čorno-žołtych rěka: „Wjeselu so, zo je so Moritz jako talentowany a robustny ‚nowačk‘ za nas rozsudźił. Sym sej wěsty, zo wón cyły swój wulki potencial pola nas zasadźi.“ To pisa Ingo Preuß, sportowy nawoda U 23 Borussije Dortmund.
Z Grabina (Finsterwalde) pochadźacy Broschinski, kiž je lěta 2015 wot Brjazkow/Złeho Komorowa do Choćebuza přišoł, bě pola FC Energije w třećej lize w hrajnej dobje 2018/2019 dźesać razow zasadźeny. W aktualnej sezonje w regionalnej lize je wón 28 winowatostnych hrow absolwował, na 17 wrotach wobdźěleny był a dźewjeć sam třělił. Georg Zielonkowski
Energija chce z pomocu zeleneho blida wróćo do třećeje ligi
Na třećim městnje w tabulce regionalneje koparskeje ligi-sewjerowuchod je FC Energija Choćebuz do koronapřestawki šła. Po wukazach, kiž su w zwisku z pandemiju nastali a kotrež zamołwići krok po krok zaso zběhnu, so we wyšoklasowych ligach prašeja, kak dale.
Za ligi jedyn do tři je Němski koparski zwjazk (DFB) hižo prawidła za nowy start wudał, cyle póćmje pak teptaja po cyłej Němskej mustwa, kotrež w regionalnych ligach hraja. Znajmjeńša tři warianty tuchwilu w sportowych towarstwach kursěruja. Druhi tabulki ligi-sewjerowuchod Lok Lipsk faworizuje tak mjenowane rjadowanje po kwocienće, tak kaž je to hižo Němski mjetarski zwjazk (DHB) za swoju zwjazkowu ligu wudał. Lok je z jednej hru w zastatku a by při wuspěchu načolnika Altglienicke přesćahnył. Tež wo turněrje ze štyrjomi mustwami je rěč, a to swjatkowny kónc tydźenja na neutralnym městnje, snano w Erfurće. Potom móhli prěni štyrjo z regionalneje ligi dobyćerja postajić, kiž by w relegaciji přećiwo dobyćerjej stafle-zapad nastupił.
Wobnowjeja Chróšćanski sportowy centrum
Kóžde sportowe towarstwo ma wězo zaměr, zo skići swojim aktiwnym sportowcam a přiwisnikam tak dobre wuměnjenja kaž móžno, tak tež Sportowa jednotka Chrósćicy (SJC).
W minjenej zymskej přestawce je so kołowokoło sportoweho centruma Jednota w Chrósćicach něštožkuli hibało, zo by za druhu połseriju koparjow wšitko spřihotowane było. Na přikład su tam saki wrotow kaž tež saki za nimi wuměnili. Nowe wabjenske tafle nětko při hrajnišću tohorunja wuhladaće. Tak witatej was na woběmaj stronomaj wjetšej a dwurěčnej tafli na domjace hry, kotrejž nastaštej we wobłuku sakskeho fondsa „Łužica – žiwa dwurěčnosć“. Tež w kabinach je so tójšto stało. W myjernjach su nowe kachlicy kładli a nowe duše instalowali. Material je gmejna přewostajiła, zwoprawdźili su projekt podpěraćeljo a čłonojo SJC a Zeleno-běłych z Hórkow dobrowólnje. Wulki dźak wšitkim, kotřiž su Chróšćansku sportowu jednotku na najwšelakoriše wašnje podpěrali. Bjez nich njeby cyły projekt móžny był!
Start 1. a 2. ligi
Prěnja a druha zwjazkowa koparska liga smětej wot přichodneje soboty zaso hrać, dyrbitej pak razne wěstotne naprawy dodźeržeć. Mjeztym pak staj w rjadach 2. zwjazkoweho ligista Dynamo Drježdźany hrajerjej na koronawirus schorjełoj, tak zo dyrbi cyłe mustwo do karanteny a njemóže pola Hannovera 96 nastupić. Tu aktualny staw prěnjeje, druheje a třećeje ligi.
Zwjazkowa koparska liga
2. Borussia Dortmund 25 68 : 33 51
3. RB Lipsk 25 62 : 26 50
4. Bor. Mönchengladbach 25 49 : 30 49
5. Bayer Leverkusen 25 45 : 30 47
6. FC Schalke 04 25 33 : 36 37
7. VfL Wolfsburg 25 34 : 30 36
8. SC Freiburg 25 34 : 35 36
9. 1899 Hoffenheim 25 35 : 43 35
10. 1. FC Köln 25 39 : 45 32
11. 1. FC Union Berlin 25 32 : 41 30
12. Eintracht Frankfurt 24 38 : 41 28
13. Hertha BSC Berlin 25 32 : 48 28
14. FC Augsburg 25 36 : 52 27
15. 1. FSV Mainz 05 25 34 : 53 26
16. Fortuna Düsseldorf 25 27 : 50 22
17. Werder Bremen 24 27 : 55 18
18. SC Paderborn 07 25 30 : 54 16
Druha zwjazkowa koparska liga
1. Arminia Bielefeld 25 50 : 24 51
2. VfB Stuttgart 25 41 : 28 45
3. Hamburgske ST 25 48 : 28 44
4. 1. FC Heidenheim 1846 25 34 : 26 41
5. HZ Greuther Fürth 25 37 : 33 36
6. SV Darmstadt 98 25 31 : 31 36
7. Holstein Kiel 25 38 : 38 34
8. FC Rudne horiny Aue 25 34 : 34 34
9. Hannover 96 25 34 : 37 32
10. Jahn Regensburg 25 36 : 42 32
11. FC St. Pauli 25 33 : 32 30
12. VfL Osnabrück 25 32 : 35 29
13. SV Sandhausen 25 30 : 33 29
14. 1. FC Nürnberg 25 34 : 45 29
15. VfL Bochum 25 40 : 45 28
16. SV Wehen Wiesbaden 25 31 : 43 25
17. Karlsruheski SC 25 33 : 46 24
18. Dynamo Drježdźany 25 25 : 41 24
Třeća liga
1. MSV Duisburg 27 50 : 35 47
2. SV Waldhof Mannheim 27 41 : 31 44
3. HZ Unterhaching 27 41 : 32 44
4. SV Meppen 27 50 : 36 42
5. FC Ingolstadt 04 27 47 : 34 42
Měšćanski běh wotprajeny
Zamołwići sportoweho towarstwa MSV Budyšin 04 su lětuši 27. měšćanski běh, kotryž bě za 12. september planowany, nětko tola wotprajili. W medijowej zdźělence rěka, zo njeje dale wotwidźeć, hdy budu wulkozarjadowanja zaso dowolene a hač hodźa so bjez wobmyslenjow přewjesć.
Přihotowanski team, sponsorojo a spěchowarjo su so nětko zhromadnje na to dojednali běhanski podawk kompletnje wotprajić. Woni su sej zamołwitosće wědomi a chcedźa wosebje dźěći škitać, kotrež so kóžde lěto we wulkej ličbje na tradicionalnym sportowym wurisanju wobdźěleja. Pod hesłom „Budyšin so hiba – nětko ćim bóle!“ pak je za september šulerske běhanske wubědźowanje planowane.
Termin Budyskeho měšćanskeho běha za lěto 2021 hižo steji. Potom ma so 18. septembra přewjesć. Dalše informacije w interneće pod www.stadtlaufbautzen.de Kilian Hrjehor
Njebjelčanski dorost z wulkim wjeselom trenował
Po dołhej přestawce móžachu młodźi koparjo Njebjelčanskeje SJ minjeny štwórtk zaso za bulom honić, byrnjež jenož jednu hodźinu a z wotpowědnymi wotstawkami. Přiwšěm bě wjeselo wulke. Trening, kotryž přewjedźechu w skupinach z pjeć hrajerjemi, bě jara dokładnje přihotowany. K tomu słušeše wězo tež wotpowědne powučenje wšitkich dźěći a staršich. Tak dyrbja dźěći mjez druhim po separatnym puću na sportnišćo přińć a je tak tež zaso wopušćić. Dalše předpisy hodźa so tohorunja derje dodźeržeć. Wšako móža za trening cyłe sportnišćo wužiwać.
Wosebje wobchad z bulom, techniske nadawki kaž tež koordinaciske a atletiske zwučowanja stejachu w srjedźišću treningoweje jednotki. Techniske wukubłanje budźe tuž dale w małych skupinach. Dwuboje a dalše zwučowanja z ćělnym kontaktom njehodźa respektiwnje njesmědźa so hišće přewjesć. Chwalić ma so w tym nastupanju disciplina koparkow a koparjow. Trening chcedźa nětko w tej formje dale wjesć.
Widźał, słyšał, napisał (11.05.20)
84 procentow mjenje dochodow formula 1 ma – tak steješe pjatk w powěsćach. Nětko hižo na to tukaja, zo budu někotre předewzaća w najwuznamnišej klasy motorsporta přestać dyrbjeć, dokelž njemóža je bjez pjenjez financować. Dilema to – a zdobom dalši krok, kiž wjedźe k wjetšej wostudźe na wubědźowanjach. Formula 1 njeje dawno hižo tak atraktiwna kaž před 15 do 20 lětami. Tehdy bě sobotniša rozmołwna tema kopańca, njedźelu wjerćeše so wona kołowokoło awtowych wubědźowanjow. Štó wě, što budźe z nowej sezonu a hač trjechi, zo chce Lewis Hamilton k Ferrarijej? Chibazo je to taktika, kotraž ma w času tajkeje dołheje přestawki k wjace rozprawam wjesć. Njeje pak to zdobom tež šansa, snano sej koncept hišće raz přemyslić, předźěłać a nowe ideje zapřijeć? Telko chwile k tomu najskerje tak spěšnje wjace njezměješ.
