Awtor dźensa

Toni Ryćer

Prěnje wuznamne motorsportowe zarjadowanje spočatk kóždeho lěta je Rallye Dakar. Tele po zdaću najnaročniše wubědźowanje je přeco njesměrnje wulke wužadanje za jězdźerjow a techniku. Prěnja „Dakar“ startowaše 1978 w Parisu. Tehdy mjenowaše so oficialnje Rallye Paris-Dakar a wjedźeše woprawdźe z francoskeje stolicy do hłowneho města Senegala na afriskim kontinenće. Z wěstotnych přičin su motorsportowe wurisanje w lěće 2008 wotprajili. Organizatoram běchu z terorowym nadpadom napřećo wobdźělenym sportowcam hrozyli. Dokelž pak so wosebje awtomobilowe twornje za dalewjedźenje jara prestižneho a lukratiwneho podawka zasadźachu, so zamołwići rozsudźichu jenož hišće jako Dakar pomjenowanu rallye w Južnej Americe přewjesć. Mnohim přiwisnikam tohole sporta so radikalna změna njelubješe, přetož bojachu so, zo so jara naročny charakter pominje. Ale hižo po prěnim lěće 2009 skeptikarjo womjelknychu. Čara přez peruske pusćiny, boliwiske wysočiny a dźiwje přestrjenje Argentinskeje wopokazachu so jako najćešo wob­knježomne wužadanja.

Koparske wokrjesne mišterstwa

Zapadołužiski koparski zwjazk zarja­duje jutře, sobotu, wot 15 do 20 hodź. w sportowni při Kamjenskim lětanišću njeoficialne halowe mišterstwa WFV. Loni je sej pokal tak mjenowaneho 6. RB-cupa cyłk LSV Hory 1990 zawěsćił, pře­winywši w finalu Wojerowski FC z 3:2. W stafli A hraja nětko ST Mały Wjelkow, SC Mały Wosyk, Arnsdorfske KT, FSV Bretnig-Hauswalde a ST Budissa 08 ­Budyšink. W stafli B nastupja mustwa Natwar Němske Pazlicy. LSV Hory 1990, Wojerowski FC, Módro-běli Njeswačidło a ST Ćisk II.

Na ptačokwasny wolejbul

Wólnočasni wolejbulisća Žołto-módrych Kulow wuhotuja póndźelu, 15. januara, „ptačokwasny turněr“ za prošene mustwa. Wot 19.15 hodź. wubědźuje so na dwěmaj hrajnišćomaj sportoweje hale šěsć cyłkow.

Běhi po hali

W Złym Komorowje budu wot 26. do 28. januara běhanske wubědźowanja. Pjatk w 11 hodź. startuja běh na sto kilometrow. Za sobotu a njedźelu su potom wjacore čary planowane. Nadrob­niše informacije pod www.hallen­marathon.de

Blidotenisowe hry

12.01. 19:00 DJK Konjecy

  – TTV 97 Kamjenc

13.01. 16:00 Viktoria Worklecy

  – TTC Nowosólc-Hródk

15.01. 19:30 ST 1922 Radwor

  – MSV Budyšin 04 VII

24.01. 19:30 SV Seeligstadt

Swoju hłownu zhromadźiznu wotmě njedawno serbske blidotenisowe towarstwo DJK Konjecy. Jeho prezident Křesćan Gruhn móžeše jara pozitiwnu bilancu za lěto 2016/2017 sćahnyć.

W dypkowych hrach docpěchu wšitke tři blidotenisowe cyłki swój stajeny zaměr. Prěnje mustwo DJK Konjecy bu wicemišter wokrjesa a přetrjechi tak wšitke wočakowanja. Druhe zastupnistwo wobsadźi w 1. wokrjesnej klasy pjate městno, a třeće bu w samsnej klasy sedme tabulki.

Wotchady Konječenjo žane njemějachu. Za to mějachu z młodostnym Julianom Hrjehorjom jara talentowany nowopřichad. Julian hraješe wjele lět pola dorosta Viktorije Worklecy, hdźež bu derje wukubłany. Na tym městnje Worklečanam dźak za wuběrne dźěło.

Bjez wulkich předrěčow su koparjo FC Energije Choćebuz tři tydźenje trajacy přihotowanski čas zahajili. Na Třoch kralow přewjedźechu woni dlěšu treningowu jednotku a slědowacej dnjej stajnje dwě wob dźeń. Nimo treningowych jednotkow změja chowancy trenarja Clausa-Dietera Wollitza tež někotre atraktiwne testowe partije. Wčera su přećiwo tře­će­mu ligistej z Halle hrali a 0:4 (0:2) přě­hrali. Njedźelu, 14. januara, přijědźe k nim na­čolnik třećeje ligi, 1. FC Magdeburg. „To je nam jara wažne, zo Magdeburg swój posledni test do druheje połserije pola nas w Choćebuzu absolwuje“, wje­seli so coach Energije na lukratiwneho přećiwnika. Mjenje zajimawy budźe štyri dny pozdźišo duel přećiwo Eintracht Braunschweigej, zastupjerjej druheje ligi.

Znate zawěsće hižo je, zo započnu so za FC Energiju dypkowe hry tydźeń zašo, a to 28. januara, hdyž nachwata w Lipsku w decembrje wupadnjenu partiju přećiwo Chemiji Lipsk.